Ўзбекистон Республикаси Вазирлар Маҳкамасининг “2018-2024 йилларда жазони ижро этиш муассасалари фаолиятини ривожлантириш чора-тадбирлари дастурини тасдиқлаш тўғрисида”ги қарори эълон қилинди. 

Ҳужжат билан қуйидагиларни ўз ичига олувчи 2018-2024 йилларда жазони ижро этиш муассасалари фаолиятини ривожлантириш чора-тадбирлари дастури тасдиқланди:

2018-2022 йилларда жазони ижро этиш муассасалари ва уларнинг ташкилотлари ишлаб чиқариш қувватларини ривожлантириш ва техник жиҳатдан қайта жиҳозлаш чора-тадбирлари 1-иловага мувофиқ;

Жазони ижро этиш муассасаларининг бюджет маблағлари ҳисобига қопланадиган коммунал харажатларини босқичма-босқич ишлаб чиқариш маблағлари ҳисобига қоплаш бўйича 2019-2024 йилларга мўлжалланган прогноз режаси 2-иловага мувофиқ;

Жазони ижро этиш муассасаларининг харажатларини босқичма-босқич ишлаб чиқариш маблағлари ҳисобига қоплаш бўйича 2020-2024 йилларга мўлжалланган прогноз режаси 3-иловага мувофиқ.

Жазони ижро этиш муассасалари ва уларнинг ташкилотларида ишлаб чиқариладиган маҳсулотлар рўйхати 4-иловага мувофиқ маълумот учун қабул қилинди.

Ўзбекистон Республикаси Ички ишлар вазирига Жазони ижро этиш бош бошқармасининг асосланган таклифига асосан Ўзбекистон Республикаси Ички ишлар вазирининг буйруғи билан Дастурга ўзгартириш киритиш ҳуқуқи берилди.

Давлат ва хўжалик бошқаруви органлари ва бошқа ташкилотларга ўз моддий-техник базасини яхшилашга бўлган эҳтиёжни жазони ижро этиш муассасалари ва уларнинг ташкилотларида ишлаб чиқариладиган маҳсулотлар ҳисобига қондириш масаласини кўриб чиқиш тавсия этилди.

Белгиланишича, мазкур қарорда назарда тутилган чора-тадбирларни амалга ошириш билан боғлиқ харажатлар Ўзбекистон Республикаси Ички ишлар вазирлиги Жазони ижро этиш бош бошқармасининг Марказлаштирилган жамғармаси маблағлари, жазони ижро этиш муассасалари ва уларнинг ташкилотлари маблағлари ҳамда қонун ҳужжатларида тақиқланмаган бошқа манбалар ҳисобидан амалга оширилади.

Ўзбекистон Республикаси Ички ишлар вазирлиги жазони ижро этиш муассасалари ва уларнинг ташкилотларининг ишлаб чиқариш фаолиятини ривожлантириш ва келгусида уларнинг даромадларини изчил ошириш борасида амалга ошириладиган ишлар ижросини ҳар чорак якуни бўйича танқидий таҳлил қилади ҳамда йўл қўйилган камчиликларни бартараф этиш юзасидан қўшимча чора-тадбирлар кўрилишини таъминлайди.

Мазкур қарорнинг бажарилишини назорат қилиш Ўзбекистон Республикаси ички ишлар вазири П.Бобожонов зиммасига юкланди.

Хусусан, Жазони ижро этиш муассасалари ва уларнинг ташкилотларида ишлаб чиқариладиган маҳсулотлар рўйхатида 77 та банд бор. Улар орасида пишган ғишт, гипс, ҳар хил турдаги йўлак плиталар, ёғоч дераза ромлари, юмшоқ мебеллар, офис мебеллари, стол ва стуллар кабилар мавжуд.