Oilaviy poliklinikalarda navbatga yozilish uchun elektron tizim joriy qilinadi

Davlat rahbari Sergeli tumani 6-A mavzesida barpo etilgan 61-oilaviy poliklinika faoliyati bilan tanishdi. Bu haqda O‘zA xabar tarqatdi. 

Uch qavatli, 250 qatnovga mo‘ljallangan oilaviy poliklinikada ultratovush tashxisi, raqamli rentgen, elektrokardiograf, fizioterapiya, klinik va biokimyo laboratoriya bo‘limlari, kunduzgi shifoxona faoliyati yo‘lga qo‘yilgan. Terapevt, pediatr, jarroh, otolaringolog, okulist, nevrolog, immunolog kabi tor soha mutaxassislari tomonidan aholiga malakali tibbiy xizmat ko‘rsatish uchun barcha sharoit yaratilgan. 

Oilaviy poliklinikadagi asosiy yangiliklardan biri – bu bemorlar navbatga yozilishi uchun elektron tizim joriy qilinganidir. Ya'ni bemor shifokor qabuliga poliklinikaga kelmasdan turib, internet yoki telefon orqali ro‘yxatxonada o‘rnatilgan tizim yordamida navbatga kiritiladi. Bu ortiqcha ovoragarchilik va vaqt sarflashning oldini oladi. 

Prezident ushbu tizimni 61-oilaviy poliklinika misolida namunaviy qilib poytaxtdagi barcha birlamchi tibbiyot muassasalariga joriy etish yuzasidan topshiriqlar berdi. Tibbiyot sohasidagi islohotlar, avvalo, oilaviy poliklinikalarga chuqur kirib borishi, ushbu maskanlar aholining salomatlik ko‘rsatkichlarini yaxshilash bo‘yicha faoliyat yuritishi, qaysi kasalliklar kamaygani, qaysilari erta aniqlanib davolanayotgani bo‘yicha muntazam axborot berilishi lozimligi qayd etildi.