Saudiya yetakchiligidagi arab davlatlari «Eron masalasi»ni Qohirada ko‘rib chiqadi

Saudiya Arabistoni yetakchiligidagi arab davlatlari Tashqi ishlar vazirlari yakshanba kuni oqshomda Misr poytaxti Qohira shahrida shoshilinch yig‘ilish o‘tkazishini ma'lum qildi.

Reuters agentligining xabar qilishicha, unda Eron masalasi hamda Livandagi Hizbulloh guruhining faoliyati muhokama etilishi rejalashtirilgan.

O‘tgan qisqa davr ichida, mintaqa Livan Bosh vaziri Saad Ol Haririy misolida eronlik shia kuchlari va sunniy arablar to‘qnashuviga guvoh bo‘lmoqda. Shuningdek, Yaman janubida yuz berayotgan notinch siyosiy o‘zgarishlar siyosiy elita vakillarini tashvishga solgani aniq.

Misrning MENA axborot agentligi tarqatgan xabarga ko‘ra, Saudiya Tashqi ishlar vazirligi tomonidan yakshanba kuni shoshilinch uchrashuvni o‘tkazish taklifini Bahrayn, BAA, Quvayt tomonlari qo‘llab-quvvatlagan.

Al-Ahram nashrining yozishicha, ushbu uchrashuv Eron hukumati uchun jiddiy ogohlantirish ma'nosini anglatishi mumkin. «BMT Xavfsizlik Kengashida ish ko‘rib chiqilishi aynan mana shu uchrashuvdan keyin hal bo‘ladi», deyiladi xabarda.

Ayni paytda Livan sobiq Bosh vaziri Ol Haririy Fransiya poytaxti Parijda mamlakat prezidenti Emmanuel Makron bilan suhbatlashish uchun vaqtincha yashab turibdi. U Livan mustaqilligi kuni, chorshanba kuni vatanga qaytishini ma'lum qilgandi.

Eslatib o‘tamiz, Livan sobiq Bosh vaziri Saad Ol Haririy Saudiya Arabistoniga tashrif buyurganidan so‘ng, o‘z yurtiga qaytmadi. Buning ustiga, siyosatchi lavozimidan bo‘shashga qaror qilganini e'lon qilgan. Bunga uning joniga suiqasd uyushtirilishi xavfi ortgani bilan qisqacha izoh bergan. Saad Ol Haririyning otasi, mamlakat sobiq Bosh vaziri Rafiq Ol Haririy 2005 yilda suiqasd oqibatida halok bo‘lgan.