Саудия Арабистони етакчилигидаги араб давлатлари Ташқи ишлар вазирлари якшанба куни оқшомда Миср пойтахти Қоҳира шаҳрида шошилинч йиғилиш ўтказишини маълум қилди.

Reuters агентлигининг хабар қилишича, унда Эрон масаласи ҳамда Ливандаги Ҳизбуллоҳ гуруҳининг фаолияти муҳокама этилиши режалаштирилган.

Ўтган қисқа давр ичида, минтақа Ливан Бош вазири Саад Ол Ҳаририй мисолида эронлик шиа кучлари ва сунний араблар тўқнашувига гувоҳ бўлмоқда. Шунингдек, Яман жанубида юз бераётган нотинч сиёсий ўзгаришлар сиёсий элита вакилларини ташвишга солгани аниқ.

Мисрнинг МEНА ахборот агентлиги тарқатган хабарга кўра, Саудия Ташқи ишлар вазирлиги томонидан якшанба куни шошилинч учрашувни ўтказиш таклифини Баҳрайн, БАА, Қувайт томонлари қўллаб-қувватлаган.

Ал-Аҳрам нашрининг ёзишича, ушбу учрашув Эрон ҳукумати учун жиддий огоҳлантириш маъносини англатиши мумкин. «БМТ Хавфсизлик Кенгашида иш кўриб чиқилиши айнан мана шу учрашувдан кейин ҳал бўлади», дейилади хабарда.

Айни пайтда Ливан собиқ Бош вазири Ол Ҳаририй Франция пойтахти Парижда мамлакат президенти Эммануэль Макрон билан суҳбатлашиш учун вақтинча яшаб турибди. У Ливан мустақиллиги куни, чоршанба куни ватанга қайтишини маълум қилганди.

Эслатиб ўтамиз, Ливан собиқ Бош вазири Саад Ол Ҳаририй Саудия Арабистонига ташриф буюрганидан сўнг, ўз юртига қайтмади. Бунинг устига, сиёсатчи лавозимидан бўшашга қарор қилганини эълон қилган. Бунга унинг жонига суиқасд уюштирилиши хавфи ортгани билан қисқача изоҳ берган. Саад Ол Ҳаририйнинг отаси, мамлакат собиқ Бош вазири Рафиқ Ол Ҳаририй 2005 йилда суиқасд оқибатида ҳалок бўлган.