«Paxtakor» Aleksandr Lobanov bo‘yicha bayonot berdi

«Paxtakor» futbol klubi rahbariyati jamoa darvozaboni Aleksandr Lobanovning Qarshidagi o‘yindan keyin o‘zini tutishi borasida yig‘ilish o‘tkazdi.

Klub matbuot xizmati bayonotida aytilishicha, yig‘ilishda Lobanovning «Nasaf» bilan bellashuvdan so‘ng muxlislar provokatsiyasiga javob qaytarib, ularga nisbatan hurmatsiz munosabatda bo‘lgani ko‘rib chiqildi. Yakunda «Paxtakor» darvozabonining o‘sha harakati keskin tanqid ostiga olindi va Lobanovga nisbatan «Paxtakor» futbol klubi tomonidan zarur chora ko‘rilib, moddiy jarima belgilandi. Bunday vaziyat yana ro‘y bergan taqdirda keskinroq chora ko‘rilishi haqida ogohlantirildi.

«Aleksandr Lobanov Qarshidagi uchrashuvdan so‘ng ro‘y bergan holatdan afsusda ekanini ma'lum qilgan. Bunga uning o‘yindan keyin juda asabiylashgani sabab bo‘lgan. Darvozabon «Paxtakor» futbol klubi hamda muxlislardan buning uchun kechirim so‘raydi. Lobanov bunday hodisa boshqa qaytarilmasligiga va'da berdi.

«Paxtakor» futbol klubi futbolchilarning xulqi va o‘zini tutishi doimo kuzatuvda ekanini ma'lum qiladi. O‘yinchilarga noprofessional harakatlari uchun choralar ko‘rilib, ular jazoga tortiladi. Klub O‘zbekistonning bayroqdor jamoasi nomiga mos holda faoliyat olib boradi», deyilgan bayonotda.