2018 йилнинг 5-8 июнь кунлари Тошкент шаҳрида Марказий Осиё мамлакатларининг иккинчи экологик форуми бўлиб ўтади. 21-22 ноябрь кунлари Олмаотада Европа Иттифоқи ва Марказий Осиё мамлакатлари минтақавий экологик маркази ҳамкорлигида бўлиб ўтаётган атроф-муҳит муҳофазаси ва сув ресурсларини бошқаришга бағишланган анжуманда шу ҳақида маълум қилинди. Тадбирда қатнашган Kun.uz мухбири шу ҳақида хабар берди.

Мустақилликка эришгандан сўнг 25 йил давомида Марказий Осиё мамлакатлари табиий ресурсларни бошқаришни ёлғиз тартибга солиб бўлмаслигини, бу борада қўшни мамлакатлар билан ҳамкорлик қилиш кераклиги тушунилгани қайд этилди.

Соҳадаги муаммоларни аниқлаш ва уларни бартараф этиш йўлларини излаш учун минтақа вакиллари кўпроқ учрашиб, таклифлар билдиришлари муҳимлиги таъкидланди. Шу кунга қадар табиий ресурслар бўйича экспертлар ўртасида жуда кўп икки томонлама учрашувлар ўтказилганлиги, келажакда соҳадаги муаммолар ечимига илмий ёндашув жоизлиги алоҳида қайд этилди. 

Келгусида табиий ресурсларни бошқариш бўйича нафақат сув ресурслари билан шуғулланувчилар, балки иқтисодчилар, ишбилармонлар ва ишлаб чиқарувчиларни ҳам жалб қилиш кераклиги таъкидланди. 

Анжуман давомида Ўзбекистон вакиллари Марказий Осиё мамлакатларининг соҳа вакилларини 20-24 ноябрь кунлари Тошкент шаҳрида бўлиб ўтадиган Оролни қутқариш халқаро фондининг яратилишига доир анжуманига таклиф қилишди.