Benzemaning qaytishi va Ronalduning rekordi. 5-turdan keyin guruhlarda qanday vaziyat?

«Tribuna» Yevropa Chempionlar Ligasining guruh bosqichida seshanba oqshomida o‘tkazilgan 5-tur o‘yinlarini sarhisob qiladi.

E guruhi
Ispaniya janubida jazirama

Sevilya – Liverpul – 3:3
Gollar: Ben Yyedder, 51, 60 - penalti. Pisarro, 90+3 – Firmino, 2, 30. Mane, 22

Kunning eng qiziqarli uchrashuvi Sevilyada o‘tkazildi. Ispaniya janubida joylashgan bu shahar ko‘chalari o‘yin kuni ikki jamoa muxlislari bilan to‘lib toshdi. Ular kim zo‘rroq to‘polon ko‘tarish bo‘yicha bahsga kirishib ketishgandi.

Muxlislarning tashabbusi maydonda futbolchilar tomonidan ham davom ettirildi. Ikki bo‘lim ikki xil kechdi. Birinchi bo‘limda «Liverpul» to‘liq ustunlik namoyish etdi va maydon egalarining har xatosini gol bilan jazolay boshladi. Firmino va Mane egizak gollar urishdi. Firmino bo‘lim oxirida markaziy himoyachilar xatosidan foydalanib yana bir bor darvozani ishg‘ol etdi.

Tanaffusda mezbonlar ustozi Eduardo Berisso o‘z futbolchilarini ruhlantirish uchun shunday dedi: «Biz endi raqibga o‘z maydoni hududidan chiqishga izn bermasligimiz kerak. Tuzatilmaydigan xato yo‘q».

Maydonga boshqacha kuch bilan qaytgan ispanlar tezda ikkita javob goli yo‘llashdi. Ikkinchi bo‘limning 15 daqiqasi ichida Ben Yyedder dubl qayd etishga ulgurdi.

Shundan so‘ng Klopp jamoasi o‘ziga kela boshladi va hujumkor o‘yin namoyish etdi. Klopp o‘z faoliyatida «Sevilya»ni ilk marta yengishga yaqin kelgandi (u «Borussiya» va «Liverpul» boshqaruvida bu klubga qarshi shu vaqtgacha 6 o‘yin o‘tkazib, 3 mag‘lubiyat va 3 durang qayd etgandi) ammo statistika o‘zgarmasdan qoldi. Pisarro o‘yinga qo‘shib berilgan daqiqalarda uchinchi golni urdi. Ispanchasiga aytganda «remondatu».

O‘sha-o‘sha «Spartak»

Spartak - Maribor 1:1 (0:0)
Gollar: Ze Luish (Melgarexo), 82 – 1:0. Meshanovich (Tavares), 90+2 – 1:1.

«Spartak» bu o‘yinda favorit edi. Uchinchi turda «Sevilya»ga qarshi o‘yindagi yirik g‘alabadan keyin ko‘pchilik «Spartak» bu guruhdan chiqishini bashorat qila boshlagandi. Ammo keyingi turda safarda «Sevilya»ga 3 ochkosi qaytarib berilgach, vaziyat o‘zgardi. 5-turda esa guruh autsayderi ustidan g‘alaba qozonib, moskvaliklar yaxshi imkoniyat hosil qilishlari mumkin bo‘lgandi. Ammo ruslarni muvaffaqiyatdan bir daqiqa ajratib qoldi - 1:0 hisobidagi ustunlikni saqlab qolishga intilgan Massimo Karrera jamoasi oxirgi daqiqalarda gol o‘tkazib yubordi va endi bu jamoa Yevropa Ligasi haqida qayg‘ursa ham bo‘ladi.

Lekin Ye guruhida hamon keyingi bosqich masalasini hal qilgan jamoa yo‘q. Bu guruhda oxirgi turda intriga ko‘p.

6 dekabr: Maribor - Sevilya, Liverpul - Spartak.

F guruhi
«Neapolcha» tortiq

Napoli – Shaxter – 3:0
Gollar: Insine, 56. Zelinski, 81. Mertens, 83

«Neapol»da turnirdagi ishtirokni davom ettirish uchun yagona imkoniyat qolgandi – «Shaxtyor» italyanlarni 6 ochkolik farq bilan ortda qoldirgandi, qolaversa Neapoldagi o‘yinning birinchi bo‘limi «konchilar»ning to‘liq ustunligi ostida kechdi. Ammo «Neapol» ikkinchi bo‘limda o‘ziga keldi. Pepe Reyna qator vaziyatlarda jamoani qutqaravergach, «Shaxtyor»ning ishtiyoqi so‘ndi va shu zahoti Insine shedevr gol urdi. Keyin yana ikki gol va 3 ochko.

Endi italyanlar va ukrainlar o‘rtasidagi farq 3 ochkoga qisqardi, oxirgi turda «Neapol» «Feyyenoord» maydoniga safar qilishi, shuningdek, «Manchester Siti» «Shaxtyor» maydonida zafar quchishiga umid qilishi kerak bo‘ladi. Shunda, o‘zaro uchrashuvlardagi ustunlik evaziga «Neapol» keyingi bosqichga o‘tishi mumkin.

Dangasa yetakchi

Manchester Siti - Feyyenoord - 1:0
Gol: Sterling, 88

Barcha o‘yinlarda g‘alaba qozonib, guruh masalasini 4 turdayoq hal qilgan «Manchester Siti» barcha o‘yinlarda mag‘lub bo‘lib kelayotgan «Feyyenoord»ga qarshi to‘p surdi. Bu o‘yin inglizlarning yirik hisobdagi g‘alabasi bilan tugashi kutilgandi, ammo Gvardiola bu o‘yinga aralash tarkib tushirdi va faqat oxirgi daqiqalarda Rahim Sterling urgan gol maydon egalari g‘alabasini ta'minladi. Kichik hisobdagi g‘alabadan keyin «Manchester Siti» turnirda yuz foizlik natija qayd etayotgan yagona jamoa bo‘lib qolmoqda. «Feyyenoord» esa turnirda hali ham bironta ochko olmagan uch jamoadan biridir («Anderlext» va «Benfika» bilan birga).

Gvardiola katta ehtimol bilan oxirgi turga ham ikkinchi tarkibni tushiradi va guruhdan ukrainlar ikkinchi o‘rinni olgan holda chiqishadi.

6 dekabr. Feyyenoord - Napoli, Shaxtyor - Manchester Siti.

G guruhi
Tarixiy durang

Beshiktosh - Portu 1:1
Gollar: Taliska, 41 - Felipe, 29

Bu ro‘y berdi - «Beshiktosh» tarixda ilk bor YeChL pley-off bosqichiga chiqdi. Istanbulliklar «Portu»ga qarshi o‘yinda kamida durangga erishishi kerak edi va minimum vazifa bajarildi. O‘yindagi gollar birinchi bo‘limda urildi, avvaliga mehmonlar vakili Felipe hisobni ochgandi, ko‘p o‘tmasdan Taliska hisobni tenglashtirdi.

Turklarning Chempionlar ligasida uy uchrashuvlaridagi mag‘lubiyatsiz seriyasi davom etadi (13 uchrashuv - 5 g‘alaba va 8 durang). Qolaversa, «Beshiktosh» Turkiya chempionatida 2 yildan buyon o‘z maydonida yutqazmayapti (2015 yilning 29 noyabridan buyon). Shu bilan birga «qora burgutlar» portugal jamoalariga qarshi g‘alabasiz seriyasini davom ettirdi (3 durang va 2 mag‘lubiyat).

«Beshiktosh» Turkiyaning YeChL pley-off bosqichiga chiqqan uchinchi jamoasiga aylandi, bungacha «Fenerbahche» va «Galatasaroy» klublari ham turnirning guruh bosqichidan o‘tgandi.

«Katta qimor»

Monako - Leyptsig - 1:4
Gollar: Falkao, 43 – Jyemerson - avtogol, 6. Verner, 9, 31 - penaltidan. Keyta, 45)

«Leyptsig» o‘ziga kelmoqda. Nemislar jamoasi Monte-Karlo kazinosida barchasini o‘rtasiga tikishdi va barchasini yutib olishdi. «Lui II» stadionidagi uchrashuvning 30-daqiqasiga keliboq o‘yinda hisob 0:3 ko‘rinishiga yetgandi. 6-daqiqada Jyemerson o‘z darvozasiga gol urib qo‘ydi, keyin Timo Verner dublni rasmiylashtirdi.

Tanaffus arafasida Falkao bittagina javob goli yo‘lladi.

Ammo o‘yinning qolgan qismida o‘tgan mavsum yarim finalchisi yana bitta gol o‘tkazib yubordi, Nabi Keyta o‘yindagi yakuniy hisobni o‘rnatdi - 1:4.

Natijada, nemislar guruhda «Portu»ga yetib oldi, «Monako» esa turnirni tark etishi, hatto Yevropa Ligasida ishtirokini davom ettirmasligi aniq bo‘ldi. Chempionlar Ligasida ilk bor qatnashayotgan «Leyptsig» esa guruhdan chiqish uchun imkoniyat saqlab qoldi.

6 dekabr. Leyptsig - Beshiktosh, Portu - Monako.

H guruhi
Omad oroli

APOEL – Real – 0:6
Gollar: Modrich, 23. Benzema, 39, 45. Nacho, 41. Ronaldu, 49, 54.

Og‘ir damlarni boshdan kechirayotgan «Real»ning joniga APOEL oro kirdi. Bu o‘yinda madridliklar yirik hisobda g‘alaba qozonib, muxlislar oldida o‘zlarini oqlashdi, qolaversa, bu o‘yin jamoaning gol urmas bo‘lib qolgan hujumchilari uchun burilish nuqtasiga aylandi. Shu vaqtgacha ichki chempionatda birgalikda ikki gol urgan Ronaldu va Benzema juftligi bu o‘yinda har biri ikkitadan gol urdi. Ammo ichki chempionatda «Barsa»dan 10 ochko ortda qolgan madridliklar Chempionlar ligasida ham «Tottenhem»ni oldinga o‘tkazib yuborgan. O‘tgan turda ushbu jamoa maydonida kechgan o‘yinda «Real» 2012 yildan beri ilk marta Chempionlar ligasi guruh bosqichidagi ilk mag‘lubiyatini qabul qilib olgandi. «Real» Kiprdagi o‘yinda mavsumdagi eng yirik g‘alabasiga (6:0) erishdi va guruhda ikkinchi o‘rin bilan keyingi bosqichga chiqadigan bo‘ldi.

«Qirollik klubi» oxirgi vaqtlarda juda kam gol urayotgandi, ammo Kipr oroli Ronalduga va boshqa jamoadoshlariga omad keltirdi. Portugaliyalik hujumchi Chempionlar ligasining joriy mavsumida urgan gollari sonini 8 taga yetkazdi. Nikosiyadagi o‘yinda hisobni Modrichning uzoqdan bergan zarbasidan keyin urilgan gol ochib bergandi – bu gol xorvatiyalik futbolchi uchun 2016 yil sentabridan beri urilgan ilk gol bo‘ldi; Yana bir golni Nacho urdi.

Bundan tashqari, Ronaldu Chempionlar ligasida bitta klub safida urilgan gollar soni bo‘yicha Lionel Messini ortda qoldirdi.

Dortmund, gudbay

Borussiya D – Tottenhem – 1:2
Gollar: Obameyang, 31 – Keyn, 48. Son Xin Min, 76

Qatorasiga 5 yil Chempionlar ligasi pley-off bosqichlarida ishtirok etib kelgan «Borussiya» seshanba oqshomida kechgan o‘yindan keyin turnirni erta tark etishi aniq bo‘ldi. Muddatidan avval keyingi bosqich masalasini hal etib bo‘lgan «Tottenhem» dortmundliklarni safarda ham mag‘lub etib, bu jamoaning oxirgi umidini ham puchga chiqardi. Nemislar o‘z murabbiyi Peter Bosga sovg‘a tayyorlay olishmadi – u shu kuni 54 yoshga to‘lgandi. Obameyang o‘yin avvalida gol urib hisobni ochgan bo‘lsada, birinchi bo‘limning o‘zida Keyn va Son Xin Min urgan gollar inglizlar g‘alabasini ta'minladi. «Tottenhem» eng kuchli guruhda birinchi o‘rinni qo‘lga kiritdi.

«Borussiya» hozircha Yevropa Ligasidagi ishtirokni ham kafolatlay olmadi – nemislar bu yo‘llanma uchun APOEL bilan raqobatlashadi, ikki jamoada ham 2tadan ochko mavjud, to‘plar nisbati nemislarda yaxshiroq, ammo oxirgi turda «Borussiya» «Real»ga qarshi o‘ynaydi.

6 dekabr. Real - Borussiya D, Tottenhem - APOEL.

Shu tariqa, hozirga kelib «Beshiktosh», «Real», «PSJ», «Bavariya», «Manchester Siti» va «Tottenhem» klublari navbatdagi bosqich masalasini hal qilishdi.