«Buyuk Ipak Yo‘li 2017/18»​ ekspeditsiyasi​ O‘zbekiston orqali o‘tadi

«​Buyuk Ipak Yo‘li 2017/18»​ xalqaro ekspeditsiyasi kelasi yil bahor faslida boshlanishi ma'lum qilindi. Bu haqda Palkiewicz Foundation​ asoschisi Yazek Palkeviyech xabar berdi.

Qozog‘iston poytaxti Ostona shahrida o‘tkazilgan anjumanda polshalik jurnalist, sayohatchi Yazek Palkeviyech «shaxsan xalqaro ekspeditsiya guruhiga bosh» bo‘lishi hamda bu rejalar 2018 yilning bahorida amalga oshirilishini e'lon qildi.

«Buyuk Ipak Yo‘li nafaqat qadimiy savdo yo‘li, balki turfa madaniyat va xalqlarni bog‘lovchi ko‘prik bo‘lgan. Ayniqsa bu savdo va ijtimoiy-siyosiy aloqa yo‘li Yevroosiyo madaniyatida o‘zining o‘chmas izini qoldirgan», deydi jurnalist.

10 ming km masofani bosib o‘tishni rejalashtirgan guruh a'zolari Xitoydan boshlab, Qirg‘iziston orqali O‘zbekistonga tashrif buyurishi kutilmoqda. Shundan so‘ng, ular Qozog‘iston, Rossiya va Belarusga kirib keladi. Ramziy ma'noda «sahro kemasi» o‘rnida mashinalardan foydalanish rejalashtirilgan.