Erdo‘g‘an G‘arbni islom dunyosini barbod qilishga urinishda aybladi

G‘arb davlatlari islom dunyosiga jinoyatchilarni “eksport” qilib, uni barbod qilishga urinmoqda, deb aytdi Turkiya prezidenti Rajab Toyyib Erdo‘g‘an. 

“Islom dunyosini barbod qilish, musulmonlar orasiga nifoq solish, ularning qadriyatlarini va eng xavflisi, kelajagini yo‘q qilish ssenariysi amalga oshirilmoqda. G‘arb islom davlatlariga barcha jinoyatchilar va banditlarni “eksport” qilib, o‘z kelajagini ta'minlashga harakat qilmoqda”, deb aytdi Erdo‘g‘an Istanbulda Islom hamkorligi takshilotining iqtisodiyot va savdo bo‘yicha qo‘mitasi yig‘ilishida. 

Erdo‘g‘anning aytishicha, IShID, “Al-Qoida”, YPG (suriyalik kurdlar mudofaa kuchlari) jangarilari va Fathulla Gulenning FeTO tashkiloti xatti-harakatlari oqibatida “mintaqa qon ummoniga g‘arq bo‘lmoqda”.

Erdo‘g‘an Suriyada 7 yildan beri yuz berayotgan fojiaga loqaydlik, Yevropa Ittifoqi davlatlari chegaralarida qochqinlarga shafqatsizcha munosabat, musulmonlarning Myanmadagi genotsidining rad etilishi G‘arbning “asl basharasini” ko‘rsatmoqda, deb aytdi. “Umuminsoniy qadriyatlar va demokratiya o‘rniga islomofobiya, neonatsistlik va irqchilik keldi”, deb aytdi Erdo‘g‘an.  

“Islom davlatlariga qurol sotish bo‘yicha ko‘p milliardlik shartnomalardan kim haqiqatan foyda oladi? Musulmonlar o‘rtasidagi adovat kimga qo‘l keladi? Mintaqada chegaralarning yangicha taqsimlanishidan kim naf ko‘radi? Bu savollarga javoblar mintaqadagi tahdidlarga qarshi kurash bo‘yicha yangi qarashni shakllantirishga imkon beradi”, deb qo‘shimcha qildi Erdo‘g‘an.