Ғарб давлатлари ислом дунёсига жиноятчиларни “экспорт” қилиб, уни барбод қилишга уринмоқда, деб айтди Туркия президенти Ражаб Тоййиб Эрдўған. 

“Ислом дунёсини барбод қилиш, мусулмонлар орасига нифоқ солиш, уларнинг қадриятларини ва энг хавфлиси, келажагини йўқ қилиш сценарийси амалга оширилмоқда. Ғарб ислом давлатларига барча жиноятчилар ва бандитларни “экспорт” қилиб, ўз келажагини таъминлашга ҳаракат қилмоқда”, деб айтди Эрдўған Истанбулда Ислом ҳамкорлиги такшилотининг иқтисодиёт ва савдо бўйича қўмитаси йиғилишида. 

Эрдўғаннинг айтишича, ИШИД, “Ал-Қоида”, YPG (суриялик курдлар мудофаа кучлари) жангарилари ва Фатҳулла Гуленнинг ФЕТО ташкилоти хатти-ҳаракатлари оқибатида “минтақа қон уммонига ғарқ бўлмоқда”.

Эрдўған Сурияда 7 йилдан бери юз бераётган фожиага лоқайдлик, Европа Иттифоқи давлатлари чегараларида қочқинларга шафқатсизча муносабат, мусулмонларнинг Мьянмадаги геноцидининг рад этилиши Ғарбнинг “асл башарасини” кўрсатмоқда, деб айтди. “Умуминсоний қадриятлар ва демократия ўрнига исломофобия, неонацистлик ва ирқчилик келди”, деб айтди Эрдўған.  

“Ислом давлатларига қурол сотиш бўйича кўп миллиардлик шартномалардан ким ҳақиқатан фойда олади? Мусулмонлар ўртасидаги адоват кимга қўл келади? Минтақада чегараларнинг янгича тақсимланишидан ким наф кўради? Бу саволларга жавоблар минтақадаги таҳдидларга қарши кураш бўйича янги қарашни шакллантиришга имкон беради”, деб қўшимча қилди Эрдўған.