Sun'iy urug‘lantirish to‘g‘risida Musulmonlar idorasining fatvosi chiqadi

O‘zbekiston Musulmonlar idorasi Ulamolar Kengashining sun'iy urug‘lantirish bo‘yicha fatvosi chiqadi. 18 noyabr kuni Diniy idora raisi, muftiy Usmonxon Alimov hazratlari diniy soha xodimlari ishtirokida majlis o‘tkazgan edi. U huquqbuzarlikka qarshi kurash borasidagi vazifalar ijrosi hamda mavjud muammolarni hal etish masalalari yuzasidan O‘zbekiston Respublikasi Prezidenti o‘tkazgan videoselektordagi muhokamalarga bag‘ishlandi. Bu haqda Idora matbuot xizmati KUN.UZ’ga ma'lum qildi. 

Yig‘ilish yakunida O‘zbekiston Musulmonlari idorasi raisi, muftiy Usmonxon Alimov hazratlari bugungi kunda O‘zbekiston jamiyatida kuzatilayotgan sun'iy urug‘lantirish masalasiga alohida to‘xtaldi. 

“Diniy idoraning Xotin-qizlar bilan ishlash bo‘limiga ushbu masala yuzasidan murojaatlar bo‘lmoqda va Fatvo bo‘limiga ham savollar kelib tushmoqda. Hatto ayrimlar yetti yot begona insonning urug‘idan homilador bo‘lib, qilgan ishi joiz emasligini bilgach, endi nima qilaman, deb bosh qotirmoqda. Xo‘sh, sun'iy urug‘lantirish borasida dinimiz ta'limotida nima deyiladi, qanday usuli joiz-u, qaysisi harom? Mo‘min-musulmonlar ham bu usullardan foydalansa bo‘ladimi? Shu kabi savollarga batafsil javob beruvchi, ushbu masalalarga aniqlik kirituvchi barcha hukm va ko‘rsatmalarni o‘z ichiga olgan fatvo ishlab chiqish va xalqimizga yetkazish zarur”, - deya ta'kidlagan Muftiy hazratlari. 

Shuningdek, Usmonxon Alimov ayollar va yosh bolalarga zulm qilish kabi jamiyatimizda uchrab turgan noxush xolatlar og‘ir gunoh ekani, shuningdek, G‘arbdan kirib kelayotgan milliy va diniy qadriyatlarimizga mutlaqo to‘g‘ri kelmaydigan eng jirkanch illatlarga qarshi fatvolar e'lon qilish orqali kurashish muhimligini alohida qayd etib o‘tdi.