21 ноябрь куни Ўзбекистон Республикаси Соғлиқни сақлаш вазирлиги ва Кореянинг етакчи тиббиёт муассасалари раҳбарлари билан бир қатор учрашувлар бўлиб ўтди.

Жумладан, «Gachon University Gil Medical Center in Incheon», «Myongji Hospital in Seoul», «Тиббий етакчилар корпорацияси», «Chonnam National University Hospital in Gwangju» ва «Chung Hospital» раҳбарлари билан музокаралар олиб борилди.

Соғлиқни сақлаш вазирлиги матбуот хизмати хабар қилишича, учрашув сўнгида Кореянинг «Chung Hospital» шифохонаси билан бирга Ўзбекистонда тиббий муассаса қуриш бўйича келишувга эришилган. «Тиббий етакчилар корпорацияси» билан икки томонлама тажриба алмашиш, Ўзбекистонда кореялик малакали мутахассислар томонидан маҳорат дарслари ўтказиш, ўзбек шифокорларининг Кореяда малакасини ошириш масаласи муҳокама этилган.

Икки томонлама тажриба алмашиш ва телетиббиётни ривожлантириш мақсадида «Gachon University Gil Medical Center in Incheon» билан англашув меморандумлари имзоланган. Шунингдек, «Myongji Hospital in Seoul» ва «Chonnam National University Hospital in Gwangju» билан яна иккита шартнома имзоланиши кутилмоқда.