2018 yilda transport sohasi uchun 5 bashorat: kosmosdagi turistlar va uchar Teslalar

Fortune nashri 2018 yilda transport sohasida ro‘y berishi mumkin bo‘lgan yangiliklarga doir 5 bashoratini e'lon qildi. Nashr bugungi kunda yetishgan yutuqlarimizga qarab, kelgusi yilda yer osti, yer usti va kosmik transportlar bilan nimalar ro‘y berishini taxmin qilib chiqqan.

Pilotsiz boshqariluvchi mashinalar yo‘llarda bug‘ularni urib yuboradi

Pilotsiz boshqariluvchi avtomobillar ishtirokidagi avariyalar onda-sonda uchrab turgani bois, bunday voqealarning har biri butun sayyora bo‘ylab tarqalmoqda. 2018 yilda pilotsiz boshqaruv dasturlari sinovlari shu qadar ko‘payadiki, ularning ishtirokidagi baxtsiz hodisalar ham statistik jihatdan oshadi. Ruldagi insonsiz sinov o‘tkazish uchun yangidan yangi zonalar vujudga keladi. Bularning barchasi texnologiyalarning rivojlanishiga, shuningdek, qurbonlarga olib keladi. Masalan, sinalayotgan mashina oldiga o‘rmondan bug‘u yugurib chiqadi.

Hyperloop — geosiyosiy musobaqa quroliga aylanadi

Mamlakatlar bu loyihani amalga oshirish tezligi bo‘yicha musobaqalashishga o‘tadi, lekin hali uni hayotga tatbiq etishga erta. G‘oya Yaqin Sharqda ko‘proq mashhurlikka erishgan. Cho‘ntaklari chuqur mahalliy investorlar unga mahkam yopishib olishgan. O‘shandan beri loyihalarni amalga oshirish bo‘yicha olamshumul muddatlar paydo bo‘lmoqda — ular uchun bu o‘ziga xos qurollanish poygasi. Fortune’ning hisoblashicha, sharqiy mamlakatlar uchun loyiha amaliy ahamiyatdan ko‘ra, nufuz jihatidan muhimroq. 2018 yil ham buni tasdiqlab beradi. Hyperloop’ning asosiy qismi  aynan Hype bo‘ladi. Yana u yoki bu joyda Hyperloop’ning yangi tarmog‘i qurilayotgani haqida yangiliklar taralib turadi. Ishlanmalarning o‘zi esa o‘rtacha tezlikda amalga osha boshlaydi.

Elektromobillar savdosi nihoyat 1 milliondan oshadi

LMC Automotive’ning bashorat qilishicha, 2018 yilda elektrokarlarning savdosi joriy yilga nisbatan 70 foizga oshadi. Butun dunyo bo‘ylab taxminan 1 millionta avtomobil sotiladi.

Turistlar koinotga parvoz qilishadi

2018 yilda Mask va Brenson koinotga turistik kemalarni uchirishmoqchi. Brenson yaqinda o‘z kemasida yarim yildan keyin parvoz qilishga tayyor ekanligini aytib o‘tgan edi. Nashrning yozishicha, kemadagi ilk yo‘lovchilar yulduzlar bo‘lishadi va bu ham trendga o‘xshash narsa bo‘ladi. Hamma ham Mask va Brensonning kemasida uchib ko‘rishni istab qoladi.

Tesla uchar avtomobil ishlab chiqarishini e'lon qiladi

Nashrning eng balandparvoz bashorati. Taxmin qilinishicha, Kremniy vodiysida uchar avtomobillar ustida ish olib borayotgan kompaniyalarning konsentratsiyasi shunday darajaga yetishganki, Ilon Maskning bu sohaga ham o‘zini urishdan boshqa iloji qolmaydi. U bu borada o‘zining shaxsiy kompaniyasini tuzadi va shaharlar ichida uchib yuruvchi apparat yaratish uchun Kitty Hawk va Uber bilan bir qatorda ishni boshlaydi.