Mustaqillik yillarida Qozog‘iston fuqaroligini bir milliondan ortiq kishi qabul qildi

Qozog‘iston fuqaroligini mustaqillik yillarida bir milliondan ortiq kishi qabul qildi, deb xabar bermoqda Oqo‘rda matbuot xizmati.

Kutilishicha, yaqin vaqt ichida yangi farmon imzolanadi, unga ko‘ra yana 734 kishi Qozog‘iston fuqarosiga aylanadi. Bu insonlarning bari respublikaga yaqin va uzoq xorij davlatlaridan kelgan.

"Mamlakatimiz mustaqillikka erishganidan beri bir milliondan ortiq inson fuqarolarimiz bo‘lishdi, bu Qozog‘iston Nursulton Nazarboyev boshchiligida ishonchli ravishda rivojlanib borayotgan davlat sifatida qabul qilinishidan darak beradi", - deya ta'kidlab o‘tgan QR davlat maslahatchisi Gulshara Abdikalikova.

Qozog‘iston prezidenti huzuridagi fuqarolik masalalari bo‘yicha komissiya yig‘ilishida ushbu mavzu muhokama qilindi. 2017 yilning may oyida bo‘lib o‘tgan avvalgi uchrashuvda komissiya a'zolari 640 kishiga fuqarolik taqdim etish masalasini ko‘rib chiqqandilar.

Shu bilan birga, Qozog‘iston fuqarolikdan mahrum qilish mumkin bo‘lgan qoidalarni kuchaytirmoqda. Mamlakat qonunchiligiga tegishli o‘zgartish va qo‘shimchalar 2017 yildan kuchga kirdi.