Жорий йилнинг 10 ойлик даврида «Ўзбекэнерго» АЖ томонидан 44,9 миллиард киловатт соат электр энергияси ишлаб чиқарилган бўлиб, шундан 39,9 миллиард қисми истеъмол учун ҳудудларга етказиб берилган. Бу ҳақда жамият бошқарув раиси ўринбосари Рўзиқул Райимов KUN.UZ мухбирига маълум қилди.

Унинг айтишича, ишлаб чиқарилган энергиянинг энг катта қисми Навоий вилоятига йўналтирилмоқда.

«Навоий вилоятида жойлашган «Навоий тоғ кон металлургия комбинати», Навоий цемент заводи ҳамда кимё саноатига оид ишлаб чиқариш корхоналари кўп электр энергия сарфини талаб қилади. Республика бўйлаб ишлаб чиқарилган энергиянинг бор-йўғи 26 фоизигина аҳоли истеъмоли учун етказилади», – деди у.

Шундай вазиятларда энергиядан самарали фойдаланишни йўлга қўйиш мақсадида «Ўзбекэнерго» АЖ 2018 йил 1 январдан бошлаб ҳисоблашнинг янги тарифлаш сеткасини эълон қилмоқда.

«Бизнинг мақсадимиз электр энергиясини ишлаб чиқаришни янада ошириш эмас, балки мавжуд ресурслардан самарали фойдаланишдир. Шундай қилиб, биз янги ҳисоблаш тарификациясини ишлаб чиқдик. Унга кўра, эрталаб ва оқшомда энергиядан фойдаланган саноат ва ишлаб чиқариш корхонаси белгиланган нархдан 1,5 баравар қимматроқ тўловни бажаради. Аксинча, кечқурун, энергияга эҳтиёж пасайган пайтда иш фаолиятини йўлга қўйган корхона эса белгиланган нархдан 1,5 баравар арзон тўлайди», – деб хабар беради Рўзиқул Райимов.

Маълум қилинишича, биргина корхона энергияга бўлган эҳтиёжини 500 мегаватт соатга камайтирса, 4та туманда истиқомат қилаётган аҳолини узлуксиз электр энергияси билан таъминлаш мумкин.

«Ўзбекэнерго» АЖ раҳбарияти ана шундай тарзда сарфланган энергияни нархлаш ва аҳолига нисбатан келгусида татбиқ этилиши режага киритилганини таъкидлаб ўтди.