Электрокарлар ишлаб чиқарувчи дунёдаги 10 та йирик корхонадан 6 таси Хитойда жойлашган бўлиб, қолган 4 таси Хитой компаниялари билан ҳамкорлик қилади. Хитойда электрокарлар ишлаб чиқариш соҳасини дунёдаги энг тезкор ва оммавий бўлишга мажбур қилувчи бир нечта омил мавжуд.

Хитойнинг энг катта муаммоларидан бири экология ҳисобланади. Хитой учун ҳавонинг ифлосланиши миллий миқёсдаги муаммога айланган. Глобал исиш эса умуман мамлакатнинг денгизбўйи шаҳарларини сув остида қолдириш билан хавф солмоқда. Шу сабабли электрокарлар экология учун курашишнинг йўлларидан бири ҳисобланади. 

Бу кураш хитойликларнинг ушбу муаммони англаганлиги билан эмас, балки электромобиллар харид қилишни рағбатлантирувчи турли давлат дастурлари билан қўллаб-қувватланмоқда. Бу дастурлар бўйича электротранспорт ишлаб чиқарувчилар ҳам, уни харид қилувчилар ҳам имтиёзлар оладилар. Хитойнинг кўплаб компанияларига бу имтиёзлар бугунги кунда оборот олишга ёрдам берган. 

2017 йил 3-чорагида Хитой ҳиссасига дунёда ишлаб чиқарилган барча электрокарларнинг ярми тўғри келди. Бу ерда нафақат маҳаллий моделлар сотилади. Кўпчилик хитойликлар “қурбинг етса, энг қимматини сотиб ол” тамойили асосида яшамоқдалар. Шу сабабли Хитой Tesla автомобилларининг бош бозорига айланган. 2016 йилда бу ерда компаниянинг 11 мингта машинаси сотилган, бу эса Илон Маск компаниясига 1 млрд. дан кўпроқ даромад келтирган. Бундан ташқари, Tesla Шанхайда завод қуришни режалаштирмоқда.  

Электрокарлар бозорининг Хитой ҳиссасига тўғри келувчи қисми Хитойнинг арзонбоп машиналар ишлаб чиқарувчи компанияларига тўғри келади. Юқорида айтилгандек, Хитойда электрокарлар ишлаб чиқарувчи 6 та йирик компания: BYD, FAW Group, SAIC, Geely, BAIC, Dongfeng бор.

Бу компанияларнинг барчаси Хитойда анчадан бери фаолият юритади. Хитойдаги иқтисодий муваффақият бу компанияларга дунё бозорига чиқишга имкон бермоқда. Бунга ёрқин мисоллардан бири сифатида Geely томондан Volvo’нинг сотиб олинишини келтириш мумкин. Швед компанияси 2019 йилдан тўлиқ электрокарлар ишлаб чиқаришга ўтмоқда. Юқоридаги рўйхатдан ўрин олган бошқа компаниялар ҳам хорижда ҳамкорларга эгалар. BAIC Калифорнияда электрокарлар ишлаб чиқиш маркази R&D’ни очган. Яқин орада бу компаниялар ўз электрокарлари билан катта бозорга чиқишни режалаштиришмоқда.