24 ноябрда Халқаро Олимпия қўмитаси Сочида ўтган 2014 йилги Олимпиада медалларини қўлга киритган икки россиялик спортчини антидопинг қоидаларини бузганликда айбдор деб топди. Шунга кўра, Сочи Олимпиадасининг бобслей спорт тури бўйича икки карра чемпиони Александр Зубков ва конькичилар ўртасидаги мусобақаларнинг (500 метр) кумуш медали соҳибаси Ольга Фаткулинанинг натижалари бекор қилинди. Бундан ташқари, улар Олимпия ўйинларида иштирок этиш ҳуқуқидан умрбод маҳрум этилишди.

ХОҚнинг 2017 йил ноябрда чиқарган қарорларига кўра, Россия терма жамоаси умумий ҳисобда 9 та: 4 та олтин, 4 та кумуш ва битта бронза медалидан маҳрум этилди. Битта олтин медаль россиялик чанғичилар Александр Легков ва Максим Вилегжаниннинг натижалари бекор қилингандан кейин яна бир россиялик чанғичи Илья Черноусовга насиб қилди.

Шу тариқа, Россия Сочи Олимпиадасида умумжамоа ҳисобида қўлга киритган медаллар сони бўйича етакчиликни қўлдан чиқарди. Россиялик спортчилар умумий ҳисобда 13 та олтин медални қўлга киритганди, энди эса улар сони 10 тагача камайди. Биринчи ўринга Сочида 11 та олтин медални қўлга киритган норвегияликлар кўтарилиб олишди, Россия эса 3-ўринга тушиб кетди. 

ХОҚ томонидан четлатилган россиялик спортчилар орасида, шунингдек, чанғичилар Александр Легков ва Максим Вилегжанин; скелетончилар Александр Третьяков ва Елена Никитина ҳам бор.