Испания чемпионатининг 13-турида, нафақат турнинг, балки мавсумнинг муҳим ўйинларидан бири бўлган «Валенсия» ва «Барселона» учрашувида ғолиб аниқланмади. Ҳакам каталонияликлар жамоасининг тоза голини ҳисобга олмади ва учрашув 1:1 ҳисобида якунланди.

«Валенсия» – «Барселона» – 1:1 (0:0)
Голлар: Родриго, 60 (1:0). Жорди Альба, 82 (1:1).
«Валенсия»: Нету, Монтойя, Габриэл Паулиста, Гарай (Везу, 86), Хосе Гайя, Солер (Мина, 89), Парехо, Кондогбья, Гонсалу Гедеш, Родриго (Перейра, 82), Дзадза.
«Барселона»: тер Штеген, Семеду (Алейш Видаль, 80), Фермален, Юмтити, Жорди Альба, Ракитич (Деулофеу, 68), Бускетс, Иньеста (Д..Суарес, 72), Месси, Л.Суарес, Паулинью.
Огоҳлантиришлар: Кондогбия, 32. Габриэл Паулиста, 44. Родриго, 74. Перейра, 89.
Ҳакам: Иглесиас Вильянуэва.
26 ноябрь. Валенсия. Mestalla стадиони.

«Валенсия» бош мураббийисиз ҳаракатланган бўлсада, мавсумдаги мағлубиятсиз серияни давом эттирди ва турнир жадвалида пешқадамлик қилаётган каталонлардан очко тортиб олди. Аслида ким кимдан нима тортиб олди, қуйида кўриб чиқамиз.

Томонларнинг йўқотишлари

Ўтган турда «Реал» ва «Атлетико» ўзаро ўйинда очко йўқотишидан кейин «Валенсия» «Барселона» учун асосий рақобатчига айланганди. Ўзаро ўйинда каталонияликлар ғалаба қозониш орқали бу рақибни ҳам ортда қолдириб кетиши (7 очко) мумкин бўларди.

Мавсумда қаторасига 8 ўйинда ғалаба қозониб келган «кўршапалаклар» бу турда тўққизинчи ғалабага ҳам иштиёқ кўрсатишди. Бу жамоа ҳужумчиси Симоне Дзадза ҳам Мессидан кейин (13) ички чемпионатда иккинчи тўпурар бўлиб турибди (9). Унинг ҳужумдаги шериги Родриго 8 гол ва 7 голли пас муаллифи сифатида Европадаги энг сермаҳсул футболчи. У бироз олдинроқ «Месталья»да 2022 йилгача қолишга рози бўлган ва янги шартномага имзо чекканди.

Бу учрашувдан олдин «Валенсия»нинг ягона йўқотиши - мураббий Марселино бўлди. У ўтган турда «Эспаньол»га қарши ўйинда ҳакам билан тортишгани учун майдондан четлатилган ва дисквалификация қилинганди. У билан бирга ўғли Серхио Гарсия ҳам четлатилган, ҳакам Эрнандес Эрнандес протоколда у ўзига сўкингани ҳақида ёзганди.

Шу тариқа, «Барселона»га қарши муҳим учрашувда валенсияликлар мураббийларсиз ҳаракат қилишга мажбур бўлишганди. Марселино ўзининг асосий мақсадига эриша олмай қолди. У мураббийлик фаолияти давомида «Барселона»га қарши турли жамоалар билан 14 учрашув ўтказган ва бирон марта ҳам ғалаба қозона олмаган (3 дуранг, 11 мағлубият).

Каталонияликлар ҳам «Месталья»га айрим йўқотишлар билан етиб келишди. Жерар Пике аввалги турда, «Леганес»га қарши ўйинда бешинчи сариқ карточкани олганди ва бу ўйинни дисквалификация туфайли ўтказиб юборди. Маскерано ҳам жароҳатдалиги туфайли бу ўйинда марказни ишониб топшириш учун икки вариант бор эди - Томас Фермален ёки, ёшлар жамоасидан чақирилган Давид Костас. Якунда Эрнесто Вальверде тажрибага ишонч билдирди ва бельгиялик футболчи майдонда ҳаракат қилди.

«Янгиланган Месси»

Бир ҳафта муқаддам каталонияликлар Туринда «Ювентус» билан 0:0 ҳисобидаги дуранг натижани қайд этиб, гуруҳдан чиқиш масаласини ҳал этишганди. Бу ўйинда Мессини захирада қолдирган Вальверде «Месталья»даги ўйиннинг аҳамияти юқорироқ эканига ишора қилганди. Жума куни аргентиналик футболчи тўртинчи марта «Олтин бутса» билан тақдирланди - унга ўтган мавсум тўпурарлиги учун ушбу соврин топширилди. Шанба куни эса у ниҳоят «Барселона» билан амалдаги шартномани (муддати 2018 йил ёзига қадар) 2021 йилгача узайтирди, бадал пули сифатида 700 миллион евро белгиланди. Шу тариқа, Месси якшанба кунги ўйинга тўла «янгиланган» ҳолда тушиб келди. Ўйин ҳам олтин учун ўйин мақомида эди.

«Кўринмас гол»

Месси ушбу ўйиндаги асосий шахс бўлиши мумкин эди, аммо ундан бу мақомни ўйин бош ҳаками Игнасио Иглесиас Вильянуэва тортиб олди. Одатда бундай муҳим ўйинлардан кейин ҳакамлик масаласи кўп муҳокама қилинади, аммо Вильянуэванинг қарорини оқлайдиган томоннинг ўзи йўқ. Каталония Мессининг ҳисобга олинмаган голини ҳали кўп эслаб юриши аниқ. Аргентиналик футболчининг берган зарбасини мезбонлар дарвозабони Нету қўлидан чиқариб юборган ва тўп дарвоза чизиғини тўла кесиб ўтганди, телетакрорлар буни яққол кўрсатиб турибди.

Гол бўлганини ҳам, майдондаги футболчилар ҳам, стадиондаги мухлислар ҳам, телетомошабинлар ҳам кўришди, аммо Вильянуэва ва унинг ёрдамчиси эмас.

Меҳмонлар бу вазиятда ғазабга минишди, аммо буни тақдир ҳазили деб қараш ҳам мумкин. Ўтган турлардан бирида «Барселона» «Малага»га қарши ўйинда тўп майдон ташқарисига чиқиб кетганидан кейин ҳам ўйинни давом эттириб гол урган ва ҳакам буни пайқамаганди. Динь тўпни чизиқ ташқарисидан олиб кирган ва Деулофеуни голли пас билан таъминлаган, бу гол ғалабани таъминлаганди. Бу икки тарих шуни кўрсатадики, Ла Лигада ҳакамлик борасида ислоҳотлар амалга оширилиши керак. Бутун дунё видеотакрорларни қўллаётган вақда испанлар ҳақиқатга юз буришмоқда.

Омадли Родриго

Вильянуэванинг ўйиндаги яна бир ҳаракати баҳсларга сабаб бўлди. Ўйиннинг 60-дақиқасида майдонга чиққан Гайя шу заҳоти қанот бўйлаб югурди ва тўпни жарима майдонига узатди. Тер Штеген тўпга ета олмади ва унинг ортида турган Родриго осонлик билан дарвозани ишғол этди. Испаниялик футболчи голни нишонлаш учун майдон четига югурди ва бошига апелсинранг парик тақди. Бундай ҳаракат учун ҳакам албатта сариқ карточка кўрсатиши керак эди, Вильянуэва воқеа жойига карточкасини қўлида кўтариб келди, лекин уни баланд кўтармади ҳамда Родриго жазоланмасдан қолди. Родриго барибир ўйинда сариқ карточка олди, 74-дақиқада у Бускетсга қарши қўполлик учун огоҳлантирилди. Агар у голни нишонлаш вақтидаги ҳаракатлари учун ҳам огоҳлантирилганида, фолдан кейин қизил олиши мумкин бўларди.

Ўзингникилар орасида бегона

«Барса» барибир мағлубиятдан қутулиб қолди. Бу сафар Месси ўзининг заргарона паси билан рақиб жарима майдонида турган Альбанинг оёқларини топди. «Валенсия» учун «Месталья»да кўплаб голлар урган бу футболчи бу сафар мезбон мухлисларни ранжитди. У каталонияликларнинг бошқа бир тарбияланувчиси, айни вақтда «Валенсия» шарафини ҳимоя қилаётган Монтойяни доғда қолдириб, дарвозани ишғол этди - 1:1.

Агар бу ўйинда каталонияликлар ҳужум чизиғида Луис Суарес яхшироқ ҳаракат қилганида ғалабага ҳам эришилиши мумкин эди, аммо уругвайлик ҳужумчи ҳар сафар офсайд ҳолатига чиқиб кетаверди ва ҳужумлар тўхтаб қолаверди. 624 кундан бери илк ўйинини ўтказган Фермален эса яхши таассурот қолдирди. Мезбонлар сафида Гонсало Гедеш ўзидан кутилган ёрқин ўйинни намойиш эта олмади, аммо ўйиндан кейин маълум бўлдики, у майдонга ўнг оёғидаги бармоқлари жароҳати билан тушганди.

Марселино яна «Барселона»ни енга олмади, «Валенсия»нинг қаторасига ғалабалар бўйича рекорди янгиланмай қолди (8 ўйин), Испаниядаги футбол ҳакамлари тизими яна бир ўртага чиқди ва лигада янги технологияларни киритиш бўйича таклифлар жонланди.

Ўйиндан кейин валенсияликлар футболчилари ва мураббийлари ҳам ҳаққоний гол ҳисобга олинмаганини тан олишди.

Эпизод ўйин натижасидан кўра кўпроқ муҳокама қилинмоқда, испаниялик собиқ арбитр Итурральде Гонсалес касбдошининг хатосини тан олган ҳолда, вазият учун чемпионат раҳбариятини айблади: «Бу очиқ кўриниб турган гол, аммо айб ҳакамда эмас, Ла Лигада. Раҳбарият ҳали ҳам голни қайд этиш тизими учун маблағ ажратмаяпти. Тағин бу лигани дунёнинг энг кучли лигаси деб аташ керакми…».

Маълумот учун, голни автоматик қайд этиш тизими Италия, Франция, Германия ва Англия чемпионатларидаги муҳим учрашувларда қўлланиб бўлинган.

Ўйинни икки томон ҳам яхши ўтказди, аммо бу ўйинни чемпионлик ўйини деб аташ қийин. Ҳакамлар хатолари бўлмаганида ҳам.