Туркманистонда ягона умумиллий сайлов куни белгиланди. Шундай қилиб, март ойининг охирги якшанба кунида барча турдаги сайловлар ўтказилиши белгиланди. "Туркманистон Сайлов кодексига ўзгартиш ва қўшимчалар киритиш тўғрисида"ги қонунга мувофиқ, ҳужжатнинг 4-моддаси биринчи қисмига айрим хатбошилар билан тўлдирилган.

"Туркманистон Президенти, Туркманистон Мажлиси (парламенти), халқ маслаҳатлари, кенгашларига сайловлар мартнинг охирги якшанбасида ўтказилади. Халқ маслаҳатлари, кенгашлар аъзоларини сайлаш маъмурий-ҳудудий тузилмалардаги ўзгаришлар сабабли бошқа муддатларда ўтказилиши мумкин", — дейилади Туркманистон миллий ахборот агентлиги хабарида. 

Ушбу қонун расман эълон қилинган кунидан эътиборан кучга кириши белгиланган. Бундан аввал, сайлов муддати парламент қарори билан аниқланар эди.