Navbatdagi uik-endda futbol muxlislarini nimalar kutmoqda? «Tribuna» Yevropa chempionatlarida navbatdagi turlar oldidan asosiy o‘yinlar anonsini taqdim etadi.
NAPOLI – YuVeNTUS (1 dekabrdan 2 dekabrga o‘tar kechasi, 00:45)
Katta o‘yinlar noodatiy tarzda bugundan boshlanadi. Jumadan shanbaga o‘tar kechasi Italiyada nafaqat turning, balki mavsumning eng markaziy o‘yinlaridan biri bo‘lib o‘tadi.
Nihoyat A Seriyada «Yuventus» odatlangan barqarorlikni namoyish qila oladigan kuch paydo bo‘ldi va «Napoli» turnir jadvalida turinliklarni 4 ochkoga ortda qoldirib ketmoqda. Natija nuqtai nazaridan neapoliklar «Manchester Siti», «PSJ» kabi jamoalar qatorida bo‘lsalar-da, Italiyada raqobat yanada yuqoriroq tempda bo‘lib o‘tmoqda, ya'ni birgina mag‘lubiyat bilan «Napoli» peshqadamlikni «Inter»ga topshirib qo‘yishi va «Yuventus»ni o‘ziga minimal masofada yaqinlashtirib qo‘yishi mumkin.
Chempionlar Ligasida qiyin ahvolda qolgan Sarri shogirdlari bor e'tiborlarini endi Skudettoga qaratishlari tabiiy va buning uchun eng jiddiy raqibini mag‘lubiyatga uchratish talab etiladi. Uxlab qolmang.
PORTU – BeNFIKA (1 dekabrdan 2 dekabrga o‘tar kechasi, 01:30)
Portugaliya chempionatining eng markaziy o‘yini. Chempionlar Ligasida guruhdagi barcha o‘yinlarni boy berib, sharmandali natija qayd etish arafasida turgan «Benfika» qatorasiga besh o‘yinda g‘alaba qozonib, ichki chempionatdagi mavqeini biroz tiklab oldi. Shu darajadaki, agar bu o‘yinda yutadigan bo‘lsa, hatto 1-o‘rinni «Portu»dan tortib olishi mumkin.
2010 yildan buyog‘ini olsak, jamoalar o‘rtasidagi o‘yinlarda «Portu»ning ustunligi yaqqol bilinadi, o‘tkazilgan 21 o‘yindan 10tasida ular g‘alaba qozonishgan. Ammo so‘nggi ikki uchrashuvda bir xil 1:1 hisobi qayd etilgan. Yana bir shunday hisob Portugaliyaning boshqa bir yetakchi klubi «Sporting»ga qo‘l kelishi va lissabonliklar turnir peshqadamiga aylanib olishlari mumkin.
UOTFORD – TOTTeNHEM (2 dekabr, 20:00)
«Tottenhem» qiyin davrni boshdan kechirmoqda. Angliya miqyosida o‘tkazilgan so‘nggi 6 o‘yinning atigi bittasida Pochettino shogirdlari g‘alaba qozondi. U ham bo‘lsa, turnir jadvalida so‘nggi pog‘onada borayotgan «Kristal Pelas» ustidan minimal hisobda qo‘lga kiritildi. Natijada Pochettino jamoasi Liga Kubogidan chiqib ketdi, APLda esa, 3-o‘rindan 7-o‘ringa tushib ketdi. Bunday pallada aynan «Uotford» maydoniga safar qilish u qadar qulay emas.
Mavzuga oid
Sababi, Markus Silva shogirdlari yetakchi jamoalar bilan yomon natija qayd etmayapti. Manchester jamoalaridan uchralgan mag‘lubiyatlarni aytmasa, «Arsenal» mag‘lub etildi, «Liverpul» bilan jangovor durangga erishilgan. Hatto 3:0 hisobida oldinga chiqib olgan Mourino jamoasi ham, tizginni bir muddat qo‘ldan chiqardi va o‘sha o‘yinni «Uotford» qutqarib qolishga ham yaqin turgandi (o‘yin 4:2 hisobida yakunlandi).
Peshqadam bilan oradagi farqi 16 ochkoga yetgan «Tottenhem» murabbiyi endi chempionlik uchun kurash imkonsiz ekanini aytgan bo‘lsa-da, kuchli to‘rtlik u qadar uzoq (4 ochko) emas. Hech bo‘lmasa, mana shu kurashda qolish uchun qiyin o‘yinda g‘alaba qozonish talab etiladi. «Uotford» esa, agar g‘alaba qozonsa, raqiblariga ochkolar bo‘yicha yetib olishi ham mumkin.
Jamoalarning so‘nggi 6 uchrashuvida «Tottenhem» g‘alaba qozongan. To‘plar nisbati – 13-2.
LeSTeR – BYoRNLI (2 dekabr (20:00)
Odatiy turlarda balki bu o‘yin e'tibordan chetda qolishi mumkindir, ammo jamoalarning aynan so‘nggi paytlarda ko‘rsatayotgan o‘yinlariga urg‘u bersak, juda qiziqarli uchrashuv bizni kutib turibdi.
So‘nggi besh o‘yinning to‘rttasida g‘alaba qozongan Shon Daych shogirdlari kutilmaganda, turnir jadvalida kuchli oltilikka kirib olishga muvaffaq bo‘ldi va qizig‘i, bunga qaysidir ma'noda «Lester» ham yordam berib yubordi. «Tulkilar» o‘tgan turda «Tottenhem» ustidan g‘olib chiqqandi.
«Lester» ham mavsum boshida autsayderlar orasida borgandi, ammo yangi bosh murabbiy kelganidan keyin natijalar ijobiy tomonga o‘zgardi. Ayniqsa, yuqorida tilga olingan so‘nggi turdagi g‘alaba «Lester»ni 15-o‘rindan birato‘la 9-o‘ringa ko‘tarib yubordi.
Har ikki jamoa ham bir-biriga o‘xshash bo‘lgan klassik ingliz futbol uslubida to‘p suradi. Bu jihat ham haqiqiy britancha futbol muxlislari uchun juda qiziq to‘qnashuv bo‘lishini ta'minlashiga shubha yo‘q.
BAYYeR – BORUSSIYa (2 dekabr, 19:30)
«Bayyer»ning Bundesligadagi oxirgi mag‘lubiyati sentabr oyida sodir bo‘lgan, aksincha, dortmundliklar esa, o‘sha oydan beri g‘alaba nimaligini bilmay kelmoqda. Hatto, «Shalke»ga qarshi o‘yinda dastlabki 20 daqiqada 4:0 hisobida oldinga chiqib olish ham, yakunda Bosh shogirdlariga g‘alaba qozonish uchun yetarli bo‘lmadi.
Bu seriyalar natijasida liverkuzenliklar «Borussiya»ni quvib o‘tish uchun yaxshi sharoit yaratib oldi. Agar bu o‘yinda «Bayyer» g‘alaba qozonadigan bo‘lsa, beshinchi o‘ringa ko‘tarilib olishi mumkin.
Jamoalarning so‘nggi 14 uchrashuvining yarmida dortmundliklar g‘alaba qozongan. Ammo o‘tgan yilning oktabr oyida Leverkuzenda bo‘lib o‘tgan o‘yinda mezbonlar 2:0 hisobida ustun kelgandi.
ARSeNAL – MANCheSTeR YuNAYTeD (2 dekabr, 22:30)
Shubhasiz, haftada Yevropaning eng markaziy o‘yinlaridan biri. Har ikki jamoa o‘yinga juda yaxshi formada kirib bormoqda. «Arsenal» APLdagi so‘nggi 7 uchrashuvning 6tasida g‘alaba qozondi, Mourino jamoasi esa, qatorasiga uch o‘yinda g‘alaba qozonib, oktabrdagi omadsizlikga barham berilganini ko‘rsatdi.
Faqat har ikki jamoa tarkibida jarohatlangan borligini e'tirof etish kerak. Aleksandr Lyakazet «Haddersfild»ga qarshi o‘yindagi jarohati sabab, ertaga maydonga tusha olmaydi. «Yunayted» tarkibida esa, Nemanya Matich so‘nggi o‘yinda almashtirildi va katta ehtimol bilan bu o‘yinni o‘tkazib yuboradi.
Murabbiylar dueli haqida aytilsa, Mourinoning Vengerdan ustunligini ko‘ramiz. Sakkiz g‘alaba va ikki mag‘lubiyat. Ammo shu bilan birga, o‘sha ikki mag‘lubiyat ham so‘nggi to‘rt o‘yinda qayd etilganini ta'kidlash zarur. Mourinoning katta o‘yinlarda asosan gol o‘tkazmaslikni maqsad qilayotganini sezish qiyin emas. Arsen Venger ushbu o‘yin oldidan raqibining o‘ta himoyaviy o‘yin ko‘rsatmasligini istayotganini yashirmadi.
Agar Angliyada bu mavsumda kuzatilayotgan top o‘yinlarga e'tibor qaratsak, mehmonlarning muvaffaqiyatsiz ekanini ko‘ramiz. Top-6 orasida o‘tkazilgan 12 o‘yindan atigi 2tasida mehmonlar g‘alaba qozongan. Ulardan biri (Tottenhem – Chelsi) «Uembli»da, ya'ni deyarli neytral maydonda o‘tganini ham unutmaslik kerak. Himoyani esdan chiqargan paytda esa, yirik hisoblar ham qayd etilgan. Bu faktor haqida portugaliyalik mutaxassis ham bilishi tabiiy.
Mehmonlarda bir kichik ustunlik bor – «Manchester Yunayted» avvalgi o‘yinini raqibiga nisbatan bir kun oldin o‘tkazdi, ertangi o‘yin uchun tiklanishga bir kun ko‘proq vaqtga ega bo‘ldi.
ATLeTIK – ReAL (2 dekabrdan 3 dekabrga o‘tar kechasi, 00:45)
Jamoalar o‘rtasidagi so‘nggi 12 o‘yinning 10tasida «Real» g‘alaba qozongan, go‘yoki, bu safar ham g‘olibni oldindan taxmin qilish osondek ko‘rinadi. Ammo o‘sha o‘yinlarning, ayniqsa Bilbaodagi to‘qnashuvlarning qanday kurashlar ostida o‘tganini ko‘rib borgan bo‘lsangiz, bugun ham «Atletik»da imkoniyat borligini ayta olasiz.
«Real»ning Bilbaoda oson g‘alaba qozonishi oxirgi marta 2013 yilda sodir bo‘lgandi. Shundan keyingi o‘yinlarda ikki marta «Real» minimal hisobda g‘alaba qozongan, bir marta durang qayd etilgan, 2014/15 yilgi mavsumda esa, Adurisning goli mezbonlarga g‘alaba keltirgan. Shuningdek, «Real» La Ligadagi so‘nggi ikki safar o‘yinida g‘alaba qozona olmaganini ham eslatib o‘tish kerak.
O‘tgan turda peshqadamlarning o‘zaro durang o‘ynashi «Real»ga qo‘l keldi va «Barselona» bilan oradagi farq 8 ochkoga qisqardi. Ammo El-klasikogacha intrigani ushlab turish uchun, «Real» o‘z o‘yinlarining barchasida g‘alaba qozonishi shart bo‘ladi.
