Bugun Angliya premer-ligasining 15-turidan o‘rin olgan uchrashuvlar start oladi. Tribuna.Uz an'anasiga mos ravishda uchrashuvlar atrofidagi qiziqarli ma'lumotlarga batafsil to‘xtaladi.
Angliya premer-ligasi, 15-tur
Chelsi - Nyukasl
Boshlanish vaqti: 2 dekabr, 17:30
Translyatsiya: Futbol TV, Match! Futbol 1
O‘yinoldi qiziqarli faktlar
«Chelsi» o‘z uyida APLda «Nyukasl»dan 15 marta ustun kelgan. Londonliklar uchun bu ikkinchi yaxshi ko‘rsatkich sanaladi. Jamoa APL tarixida faqat «Tottenhem»ni o‘z uyida ko‘proq yenggan (16 marta).
«Nyukasla»ning «Chelsi» uyidagi yagona g‘alabasi 2012 yilning mayida kuzatilgan bo‘lib (2:0) o‘shanda Papis Sisse qahramonlik ko‘rsatgandi.
Villian «Nyukasl» bilan so‘nggi marta to‘qnash kelingan 2015-16 yilgi mavsumdagi ikki uchrashuvda ham gol urgan. Braziliyalik futbolchi bunday natijaga yana to‘rtta («Everton», «Sauthempton va «Stok Siti») jamoaga qarshi uchrashuvda erisha olgan.
Jonjo Shelvi «Suonsi» va «Liverpul» futbolchisi sifatida ham «Chelsi» darvozasiga gol urgan. Agar u bu safar ham gol ura olsa, Geri Skottdan keyin «Chelsi» davrozasiga uchta yoki undan ko‘proq jamoa safida gol urgan ikkinchi futbolchiga aylanadi.
Yo‘qotishlar
«Chelsi» tarkibida David Luiz va Charli Musonda jarohati sabab maydonga tusha olmaydi. Ammo Mishi Batshuayi va Kenedi safga qaytgan.
«Nyukasl» tarkibida Jamaal Lasells, Kristian Atsu va Pol Dammit uchrashuvni o‘tkazib yuboradi.
Brayton - Liverpul
O‘yinoldi qiziqarli faktlar.
Bu ikki jamoa APL doirasida ilk marta to‘qnash kelmoqda. So‘nggi marta Angliya chempionatida (premer-liga tashkil qilinmasdan oldin) 1982/1983 yilgi mavsumda «Brayton»da bo‘lib o‘tgan uchrashuvda 2:2 hisobida durang qayd etilgan.
Umuman Angliya chempionatida bu ikki jamoa «Brayton» uyida 4 marta uchrashgan bo‘lib, uchta uchrashuvda durang qayd etilgan, «Liverpul»da bitta g‘alaba.
APL 1-turidagi «Manchester Siti»dan uchralgan mag‘lubiyatdan so‘ng «Brayton» o‘z uyida ketma-ket 6 uchrashuvdan buyon mag‘lubiyatga (2 g‘alaba, 4 durang) uchramay kelmoqda.
«Ameks» stadioni «Liverpul» Premer-ligada to‘p suradigan 57-stadion bo‘ladi; ular shu kungacha o‘ynagan 56 stadionning 52tasida g‘alaba qozongan va bu APLning istalgan jamoasidan yaxshi ko‘rsatkich sanaladi.
Muhammad Salah «Liverpul» futbolchisi sifatida Angliya Premer-ligasining 14 turida 12ta gol urdi — bu klub rekordi sanaladi.
Yo‘qotishlar
«Brayton» tarkibida yagona yo‘qotish Stvi Siduell bo‘lib turibdi. Qisqa tanaffusdan so‘ng Gaetan Bong maydonga tushishga shay.
«Liverpul» markaziy himoyachisi Joel Matip xizmatidan foydalana olmaydi, ammo uning sherigi Ragnar Klavan kasallikdan so‘ng safga qaytgan.
Uotford - Tottenhem
Boshlanish vaqti: 20:00
Translyatsiya: Match! Futbol 1 (yozib olingan holda)
O‘yinoldi qiziqarli faktlar
«Uotford» Premer-liga doirasidagi «Tottenhem»ga qarshi o‘tgan 8 uchrashuvda biror marta ham g‘alaba qozona (2 durang, 6 mag‘lubiyat) olmagan.
«Uotford» joriy mavsumda London jamoalariga qarshi ikkita uchrashuv («Arsenal» va «Vest Hem») o‘tkazib, ikkalasida ham g‘alaba qozongan.
Agar «Tottenhem» mag‘lubiyatga uchraydigan bo‘lsa, 2009 yilning yanvaridan buyon ilk marta APLda ketma-ket to‘rtta uchrashuvni yutqazgan jamoaga aylanadi.
Kiran Tripper «Uotford»ga qarshi 4 uchrashuvda 4ta golli uzatma amalga oshirgan. Bu uning bir jamoaga qarshi o‘yindagi eng ko‘p samarali harakat sanaladi.
Yo‘qotishlar
«Uotford» tarkibida Uill Hyuz jarohati sabab maydonga tusha olmaydi. Migel Britosning ishtiroki so‘roq ostida qolmoqda. Isaak Sakses esa jarohatdan tuzalib safga qaytgan.
«Tottenhem» tarkibida Viktor Vanyama va Tobi Alderveyreld uzoq muddatga safdan chiqqan. Harri Uinks esa jarohatidan tuzalib safga qaytdi.
Lester - Byornli
Boshlanish vaqti: 20:00
O‘yinoldi qiziqarli faktlar
«Byornli» 2017 yilning yanvarida Semmi Uoksning yagona goli evaziga «Lester»ni mag‘lub etib, 10 uchrashuvdan iborat g‘alabasiz (3 durang, 7 mag‘lubiyat) seriyasiga yakun yasadi.
«Lester» o‘z uyida o‘tkazgan so‘nggi 14 o‘yindan faqat «Manchester Siti»ga qarshi uchrashuvda (0:2) gol ura olmadi.
«Byornli» mehmonda eng ko‘p ochko to‘plash bo‘yicha mavsum rekordini takrorlab bo‘ldi: 14 ochko. 2014/15 yilgi mavsumda jamoa shu natijani qayd etgandi. Navbatdagi ochko klub uchun yangi rekordga aylanadi.
Jyeymi Vardi yana bitta gol kiritsa, «Lester» tarkibida Premer-ligada 50ta gol kiritgan ilk futbolchiga aylanadi.
Yo‘qotishlar
«Lester» tarkibida Kristian Fuks qiz farzandi tug‘ilganidan so‘ng yana klub qarorgohiga qaytib kelgan. Metti Jyeyms va Robert Hut hamon jarohatidan davolanmoqda.
«Byornli» tarkibida Mett Louton maydonga tusha olmaydi. Stiven Defur esa safga qaytgan.
Arsenal - Manchester Yunayted
Boshlanish vaqti: 22:30
Translyatsiya: Futbol TV,Match TV, Match! Futbol 1
O‘yinoldi qiziqarli faktlar
«Arsenal» «Manchester Yunayted»ga qarshi APLdagi o‘z uyida kechgan so‘nggi besh uchrashuvda faqat bir marta mag‘lubiyatga (2 g‘alaba, 2 durang) uchragan. So‘nggi ikki uchrashuvda g‘alaba qozonganida, o‘z darvozasidan birorta ham to‘p o‘tkazib yubormagan.
Hech bir jamoa «Arsenal» uyida «Manchester Yunayted»chalik ko‘p uchrashuvda (7ta uchrashuv, «Liverpul» bilan bir xil natija) g‘alaba qozona olmagan. Shuningdek faqatgina «Chelsi» «Emireyts» stadionida o‘yinlar o‘tkazila boshlanganidan buyon bu stadionda «Yunayted»dan ko‘proq muvaffaqiyatga (4ta g‘alaba) erishgan.
«Arsenal» APL doirasida o‘z uyida kechgan so‘nggi 12 uchrashuvda g‘alaba qozondi. So‘nggi marta jamoa 2005 yilning feralidan noyabriga qadar «Hayberi»da uzoq (ketma-ket 13 uchrashuv) g‘alabali seriya ko‘rsata olgandi.
Mesut O‘zil «Manchester Yunayted»ga qarshi so‘nggi 4 uchrashuvida 4ta gol ishtirokchisi bo‘lgan (2 gol, 2 golli pas).
Yo‘qotishlar
«Arsenal» tarkibida Aleksandr Lyakazett maydonga tusha olmaydi. Santi Kasorla esa uzoq vaqtdan buyon safga qayta olmayapti. Aleksis Sanchesda ham «Haddersfild»ga qarshi uchrashuvda kichik muammo paydo bo‘lgandi, ammo bugungi uchrashuvga u tayyor bo‘lishi kerak.
«Manchester Yunayted» himoyachilari Fil Jons va Erik Bayi maydonga tusha olmaydi. Nemanya Matichning ishtiroki ham katta so‘roq ostida turibdi.
Manchester Siti - Vest Hem
«Manchester Siti» Premer-liga doirasidagi «Vest Hem»ga qarshi «Etihad»dagi so‘nggi 11 uchrashuvining 9tasida (1 durang, 1 mag‘lubiyat) g‘alaba qozongan va har bir uchrashuvda gol kiritishning uddasidan chiqqan.
«Manchester Siti»ning APLdagi ketma-ket g‘alabalari soni 12taga yetdi. Faqatgina «Chelsi» (13 g‘alaba 2016/17 yilgi mavsumda) va «Arsenal» (13 g‘alaba 2001/02 yilgi mavsumda) ulardan yaxshiroq natijaga erishgan.
«Vest Hem» 2015 yilning sentabrida «Siti» uyida g‘alaba qozonib (2:1), «shaharliklar»ning 11 uchrashuvdan iborat g‘alabali (rekord) seriyasiga barham bergandi.
Serxio Aguero «Vest Hem»ga qarshi 10 uchrashuvda maydonga tushib, 8 golda ishtirok (6 gol, 2 golli uzatma) etgan.
Yo‘qotishlar
«Manchester Siti» tarkibida Jon Stounz va Benjamen Mendi safdan chiqqan. Hafta o‘rtasida shamollab qolib «Sauthempton»ga qarshi uchrashuvni o‘tkazib yuborgan Leroy Sane maydonga tushishga shay.
«Vest Hem» tarkibida Chicharito, Endi Kerroll va Joze Fonte jarohati sabab maydonga tusha olmaydi. Jo Hart ijara kelishuviga ko‘ra, bu uchrashuvda ishtirok etishi mumkin emas. Uinston Ridning ishtiroki esa so‘roq ostida turibdi.
Qolgan uchrashuvlar
Everton - Haddersfild (20:00)
Stok Siti - Suonsi (20:00)
Vest Bromvich - Kristal Pelas (20:00)
Bornmut - Sauthempton (3 dekabr, 18:30)
Azamat Murodov tayyorladi
