Япониянинг Киото шаҳридаги мактаблардан бирига ёввойи тўнғизлар кириб олиб, у ерни остин-устун қилди.

Воқеа 4 декабрда тушлик вақтида юз берган, деб хабар бермоқда NHK телерадиокомпанияси. Номаълум сабабларга кўра мактаб ичига кириб олган тўнғизлар зиналар ва қаватлар бўйлаб чопиб юрган, чиқинди бакларини титиб ташлаган, биттаси ҳаттоки сув ҳавзасида “чўмилишга” ҳам улгурган.

Тўнғизларни мактаб ичидан чиқариш учун полиция ухлатувчи дори билан ўқланган қурол қўллашига тўғри келган. Шундан кейин тўнғизларнинг барчаси нобуд бўлгани аниқланган.

Таъкидланишича, тўнғизлар Киотодаги жамоат жойларига вақти-вақти билан “ташриф буюриб туришади”. Мисол учун, 27 ноябрда шаҳардаги бутхонада тўнғиз бир кишига ҳужум қилиб, уни қўлидан майиб қилган.