Veterinariya xizmati xodimlariga qo‘shimcha haq to‘lash to‘g‘risida qaror e'lon qilindi

O‘zbekiston Respublikasi Vazirlar Mahkamasining «Davlat veterinariya xizmati xodimlari mehnatiga qo‘shimcha haq to‘lash va ularni moddiy rag‘batlantirish chora-tadbirlari to‘g‘risida»gi qarori e'lon qilindi.

O‘zbekiston Respublikasi Prezidentining “O‘zbekiston Respublikasi Davlat veterinariya qo‘mitasi faoliyatini tashkil etish chora-tadbirlari to‘g‘risida” 2017 yil 1 iyundagi PQ-3026-son qarorining ijrosini ta'minlash, shuningdek davlat veterinariya xizmati xodimlari mehnatiga qo‘shimcha haq to‘lash va ularni moddiy rag‘batlantirish tizimini yanada takomillashtirish maqsadida Vazirlar Mahkamasi qaror qildi:

1. Quyidagilar:

Xavfli va zararli mehnat sharoitlarida ishlayotgan veterinariya xizmati xodimlari mehnatiga qo‘shimcha haq to‘lash shartlari va tartibi to‘g‘risidagi nizom 1-ilovaga muvofiq;
O‘zbekiston Respublikasi Davlat veterinariya qo‘mitasi va uning tizimiga kiruvchi tashkilotlar xodimlarini moddiy rag‘batlantirish shartlari va tartibi to‘g‘risidagi nizom 2-ilovaga muvofiq tasdiqlandi.

2. O‘zbekiston Respublikasi Davlat veterinariya qo‘mitasi manfaatdor vazirlik va idoralar bilan birgalikda bir oy muddatda o‘zlari qabul qilgan normativ-huquqiy hujjatlarni ushbu qarorga muvofiqlashtiradi.

3. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari - Qishloq va suv xo‘jaligi vaziri Z.T. Mirzayev va Davlat veterinariya qo‘mitasi raisi vazifasini bajaruvchi B.T. Norqobilov zimmasiga yuklandi.

Xavfli va zararli mehnat sharoitlarida ishlayotgan davlat veterinariya xizmati xodimlari mehnatiga qo‘shimcha haq to‘lash shartlari va tartibi to‘g‘risidagi nizomga ko‘ra, davlat veterinariya xizmati xodimlari mehnatiga qo‘shimcha haq to‘lash ularning lavozim maoshiga qo‘shimcha ustama (foiz miqdorida) to‘lash yo‘li bilan amalga oshiriladi.

Quyidagi davlat veterinariya xizmati xodimlarining lavozim maoshiga (tarif stavkasiga) 12 foizli ustamalar belgilanadi:

Respublika hayvonlar kasalliklari tashxisi va oziq-ovqat mahsulotlari xavfsizligi davlat markazi, Qoraqalpog‘iston Respublikasi va viloyatlar hayvonlar kasalliklari tashxisi va oziq-ovqat mahsulotlari xavfsizligi davlat markazlari, tuman (shahar) hayvonlar kasalliklari tashxisi va oziq-ovqat mahsulotlari xavfsizligi davlat markazlari direktorlari va ularning o‘rinbosarlari. laboratoriya (veterinariya-sanitariya ekspertizasi laboratoriyalari) mudirlari. veterinariya vrachlari. veterinariya feldsherlari (texniklar). veterinariya laborantlari va veterinariya sanitarlari. omborxona (dorixona) mudirlari va mutaxassislari;

Veterinariya ilmiy-tadqiqot institutining ilmiy xodimlari. laboratoriyalari mudirlari, veterinariya vrachlari, veterinariya laborantlari va veterinariya sanitarlari, omborxona (dorixona) mudirlari va mutaxassislari;

Veterinariya dori vositalari. ozuqabop qo‘shimchalar sifati va muomalasi nazorati bo‘yicha davlat ilmiy markazi direktori va uning o‘rinbosari; veterinariya dori vositalari va ozuqabop qo‘shimchalarni standartlash va sertifikatlash bo‘limi mudiri. veterinariya vrachlari, veterinariya laborantlari va veterinariya sanitarlari;

tuman (shahar) veterinariya bo‘limlari boshliqlari va ularning o‘rinbosarlari, veterinariya faoliyatini muvofiqlashtirish va davlat nazorati bo‘yicha mutaxassislar, hayvonlar kasalliklari tashxisi va oziq-ovqat mahsulotlari xavfsizligi bo‘yicha mutaxassislar. veterinariya uchastka mudirlari. veterinariya-sanitariya ekspertiza laboratoriyalari mudirlari, veterinariya vrachlari. veterinariya feldsherlari (texniklar). veterinariya laborantlari va veterinariya sanitarlari. omborxona (dorixona) mudirlari va mutaxassislari;

kasallik yuqtirilmagan hayvonlar uchun (sinov laboratoriya hayvonlari yetishtiruvchi) vivariy mudirlari, veterinariya vrachlari, veterinariya laborantlari va veterinariya sanitarlari;

Davlat chegarasi va transportdagi davlat veterinariya nazorati boshqarmasi veterinariya punktlari veterinariya feldsherlari (dezinfektorlar), veterinariya-sanitariya uchastkalari veterinariya vrachlari, veterinariya feldsherlari (dezinfektorlar). veterinariya sanitarlari;

davlat veterinariya xizmati muassasalari maxsus avtomobil haydovchilari.

Quyidagi davlat veterinariya xizmati xodimlarining lavozim maoshiga (tarif stavkasiga) 24 foizli ustamalar belgilanadi:

Respublika hayvonlar kasalliklari tashxisi va oziq-ovqat mahsulotlari xavfsizligi davlat markazi. Qoraqalpog‘iston Respublikasi va viloyatlar hayvonlar kasalliklari tashxisi va oziq-ovqat mahsulotlari xavfsizligi davlat markazlari, tuman (shahar) hayvonlar kasalliklari tashxisi va oziq-ovqat mahsulotlari xavfsizligi davlat markazlari mikrobiologiya, virusologiya, mikologiya, parazitologiya, bakteriologiya, serologiya, taksikologiya laboratoriyalari mudirlari, veterinariya vrachlari, veterinariya feldsherlari (texniklari) veterinariya laborantlari va veterinariya sanitarlari;

Veterinariya dori vositalari, ozuqabop qo‘shimchalar sifati va muomalasi nazorati bo‘yicha davlat ilmiy markazidagi mikroorganizm shtammlarini nazorat qilish bo‘limi, veterinariya dori vositalarini va oziqabop qo‘shimchalarini aprobatsiya qilish bo‘limi. veterinariya dori vositalari va oziqabop qo‘shimchalarining sifati va muomalasi davlat nazorati bo‘limi mudirlari. veterinariya vrachlari. veterinariya feldsherlari (texniklar) veterinariya laborantlari va veterinariya sanitarlari;

Veterinariya ilmiy-tadqiqot instituti gelmintologiya, protozoologiya, gelmintozoonoz, patanatomiya, virusologiya. brutsellyoz va tuberkulyoz laboratoriyasi mudirlari, veterinariya vrachlari, veterinariya feldsherlari (texniklar), veterinariya laborantlari va veterinariya sanitarlari;

kasalliklarning jonli qo‘zg‘atuvchilari yuqtirilgan hayvonlar bilan ishlash (sinov-laboratoriya hayvonlari yetishtiruvchi) vivariy hamda rentgen kabinetlarida ishlaydigan bo‘lim mudirlari. veterinariya vrachlari. veterinariya laborantlari va veterinariya sanitarlari.

Davlat veterinariya xizmati xodimiga u ishlayotgan mehnat sharoitining zararliligidan kelib chiqib. to‘lanishi lozim bo‘lgan ustamalarning (12 yoki 24 foizli) har ikkalasi xam to‘g‘ri kelgan holatlarda. uning lavozim maoshiga 24 foizli ustama belgilanadi.

O‘zbekiston Respublikasi Davlat veterinariya qo‘mitasi va uning tizimiga kiruvchi tashkilotlar xodimlarini moddiy rag‘batlantirish shartlari va tartibi to‘g‘risidagi nizomga ko‘ra esa, xodimlarga ish haqi miqdori O‘zbekiston Respublikasi Bandlik va mehnat munosabatlari vazirligi. Moliya vazirligi bilan kelishgan hamda Davlat veterinariya qo‘mitasi tomonidan tasdiqlanadigan namunaviy tarif razryadlaridan kelib chiqib hisoblanadi.

Xodimlarni moddiy rag‘batlantirish maqsadida ularning oylik maoshiga qo‘shimcha tarzda:

xodimning sohadagi ko‘p yillik xizmatlari uchun qat'iy belgilangan lavozim maoshiga ustama;

veterinariya to‘g‘risidagi qonun hujjatlari talablari ijrosini nazorat qilish yuzasidan veterinariya inspektorlarining xizmat vazifalariga ko‘ra doimiy yashash joyidan boshqa joyda bo‘lganligi uchun oylik maoshiga qo‘shimcha kompensatsiya to‘lovi;

oylik, choraklik, yil yakuni bo‘yicha hamda bayram kunlari uchun mukofotlar;

xodimlarni ijtimoiy himoya qilish va ular sog‘lig‘ini tiklash uchun moddiy yordam;

xodimlarning hayotini sug‘urta qilish yoki boshqa turdagi to‘lovlar belgilanadi.

Xodimning sohadagi ko‘p yillik xizmatlari uchun qat'iy belgilangan lavozim maoshiga ustamalar har oyda tarif setkasi va shtat jadvaliga muvofiq holda quyidagi miqdorda to‘lanadi:

3 yildan 5 yilgacha - 5 foiz;
5 yildan 10 yilgacha - 10 foiz;
10 yildan 15 yilgacha - 15 foiz;
15 yildan 20 yilgacha - 20 foiz;
20 yildan 25 yilgacha - 25 foiz;
25 yildan ortiq - 30 foiz.

Ish ko‘rsatkichlari bajarilishiga qarab oy va chorak yakuni bo‘yicha xodimlar oylik ish haqining bir baravarigacha miqdorda, yil yakuni bo‘yicha xodimlar oylik ish haqining uch baravarigacha miqdorda mukofotlar beriladi. O‘zbekiston Respublikasining Mustaqillik kuni. Konstitutsiyasi kuni, Yangi yil, Navro‘z va Hayit bayramlari uchun xodimlar oylik ish haqining bir baravarigacha miqdorda rag‘batlantiriladi.

Xodimlarni ijtimoiy qo‘llab-quvvatlash va ularning ish samaradorligini oshirish maqsadida har oyda (jamoa shartnomasiga muvofiq) yo‘l transporti uchun eng kam oylik ish haqining bir baravarigacha hamda xodimlarning tushlik ovqatlanishi xarajatlariga ko‘maklashish maqsadida eng kam oylik ish haqining ikki baravarigacha to‘lovlar amalga oshiriladi.

Xodimlarga qishloq xo‘jaligi mahsulotlari sotib olish uchun har yili bir marta eng kam oylik ish haqining 10 baravarigacha miqdorda to‘lov tashkilotlar tomonidan o‘z mablag‘lari hisobidan amalga oshiriladi.

Quyidagilar xodimlarni rag‘batlantirishni moliyalashtirish manbalari hisoblanadi:

O‘zbekiston Respublikasi Davlat veterinariya qo‘mitasining Veterinariya xizmatini rivojlantirish jamg‘armasi mablag‘lari;

Davlat veterinariya qo‘mitasi va uning tizimiga kiruvchi tashkilotlarni rivojlantirish jamg‘armalari mablag‘lari (pulli veterinariya xizmati ko‘rsatishdan, vaqtincha foydalanilmagan mol-mulkni ijaraga berishdan tushumlar. beg‘araz olingan yordamlar va qonunda taqiqlanmagan boshqa tushumlar);

qonun hujjatlarida taqiqlanmagan boshqa mablag‘lar.