Fransiya hukumati Eron harbiylari Yamandagi jangari husiylarni qurol-yarog‘ bilan ta'minlab turgani borasidagi harakatiga munosabat bildirdi. Gap shundaki, AQSh Mudofaa vazirligi Eronning ushbu harakatlarni bajaryotganida ayblab, asosli dalillar qo‘lga kiritilganini ta'kidlagandi.
Juma kuni o‘tkazilgan kichik brifing davomida Fransiya Tashqi ishlar vazirligi Matbuot kotibi Aleksandr Jorjini «ushbu harakatga BMT tomonidan rasmiy xulosa berilmaguncha, har qanday savol ochiq» qolishini bildirdi.
Eslatib o‘tamiz, AQShning BMTdagi doimiy vakili Nikki Heyli payshanba kuni Eron Mudofaa vazirligi tasarrufidagi «Qiyyom» ballistik raketasi husiylarning qo‘lida paydo bo‘lib qolgani haqida xabarni oshkor qilgandi.
Ma'lum qilinishicha, joriy yilning 4 noyabr kuni Yaman hududidan Saudiya Arabistonidagi Qirol Xolid xalqaro aeroportiga qarata uchirilgan raketalar aynan Eron Mudofaa vazirligi tasarrufidagi qurollar bilan bir xil bo‘lib chiqmoqda.
