Bosh vazir o‘rinbosari: «​Inflyatsiya darajasi 14 foiz bo‘lishi kutilmoqda, kelasi yil ham yuqori bo‘ladi»​

O‘zbekiston Respublikasi Senatining XIII yalpi majlisi birinchi ish kuni o‘z nihoyasiga yetdi. Bu galgi yalpi majlisda ikki nafar yangi saylangan senator, Samarqand viloyati hokimi Turobjon Jo‘rayev hamda Xorazm viloyati hokimi Ilgizar Sobirov ham ishtirok etdi. Bu haqda Kun.uz muxbiri xabar beradi.

O‘zbekiston Respublikasi Senatining XIII yalpi majlisi kun tartibiga 26ta masala qo‘yilgan bo‘lib, O‘zbekiston Respublikasi Bosh vaziri o‘rinbosari, Moliya vaziri Jamshid Qo‘chqorov 2018 yilga mo‘ljallangan makroiqtisodiy ko‘rsatkichlar, soliq va byudjyet siyosatini yanada takomillashtirish chora-tadbirlari to‘g‘risidagi ma'lumotlarni senatorlarga havola etdi.

Jamshid Qo‘chqorovning aytishicha, olib borilgan siyosiy islohotlar natijasida, joriy yilda makroiqtisodiy barqarorlik va rivojlanish sur'atlari ijobiy ko‘rsatkichni saqlab qolmoqda.

«Joriy yil yakunlari bo‘yicha, yalpi ichki mahsulot hajmining 5,5 foizga, sanoat mahsulotlarini ishlab chiqarish bo‘yicha 5,7 foizga, qishloq xo‘jaligining 3,5 foizga, chakana savdo aylanmasining 5,2 foizga o‘sishi kutilmoqda. Tovar va xizmatlar eksporti hajmi esa 14 foizga o‘sishi kutiladi. Inflyatsiya ko‘rsatkichi 14 foiz bo‘lishi kutilmoqda, ammo bundan avvalgi ma'lumotlarning shaffof ekanligiga Xalqaro valyuta jamg‘armasi ham shubha qilgandi», deydi vazir.

Moliya vazirining fikricha, oxirgi paytda statistik ma'lumotlarni aniqlashtirish, ularni xalqqa to‘g‘ri yetkazib berishga katta e'tibor qaratilmoqda: qisqa muddat ichida Markaziy Bank, Davlat Statistika qo‘mitasi, Moliya va Iqtisodiyot vazirliklari Xalqaro Press klubda ishtirok etib, haqiqiy iqtisodiy raqamlarni oshkor etgan.

«Bunga nima turtki bo‘ldi? O‘zbekistonlik iqtisodchilar rivojlanish strategiyasi nima, iqtisodiyot qay oqimga og‘ishmoqda, bu statistika xalqaro talablarga javob beradimi, degan savollarga javob berishi kerak. Gapning indallosini aytganda, minbarlardan turib, ayrim raqamlarni aytganimizda juda ko‘p odamlar miyig‘ida kulib qo‘yardi. Shuning uchun, inflyatsiya haqida gapirganda aytish joizki, u joriy yilda haqiqatan yuqori bo‘lishi kutilyapti. Keyingi yilda ham (inflyatsiya) yuqori darajada bo‘lib, 12-13 foiz atrofida bo‘lishi kutilmoqda. Prezident mana shu haqda ochiq-oydin gapirishni aytmoqda: kelgusi yilda kuzatilishi mumkin bo‘lgan raqamlarni ham oshkor etmoqdamiz. Shuningdek, respublikaning eng chekka hududlarigacha yoyilgan aholi vakillariga eng qulay narxda birlamchi oziq-ovqat mahsulotlarini sotib olish imkoniyatini yaratish kerakligiga e'tibor qaratilyapti», deydi Bosh vazir o‘rinbosari.

2017 yildagi davlat byudjyetining daromadlar bo‘yicha ijrosi shuni ko‘rsatyaptiki, barcha soliq turlari va boj to‘lovlari rejalar to‘liq bajarilishi kutilmoqda, shuningdek, 2016 yildagi raqamlar bilan solishtirganda, daromadlar 8,3 trillion so‘mga yoki 20 foizga o‘sishi kutilyapti. 

«​Bu yerda ko‘plab hurmatli hokimlar, vazirlar ishtirok etmoqda. Avvalgi yillarda, g‘aznachilik harakati 15 dekabr kunidan boshlab to‘xtatilishi kuzatilardi, bugungi kunga kelib, biror soat ham xarajatni to‘xtatganimiz yo‘q. Bu yilgi profitsit, undan avvalgi davrdan bitta katta farqi bor: ayni vaziyatda tabiiy profitsitni ko‘rsatmoqdamiz. Bironta ishlarni qoldirmasdan, to‘liq moliyalashtirib kelyapmiz. Vaholanki, sun'iy ravishda harakatlarni cheklash, to‘xtatib qo‘yish yoki belgilangan muddatgacha «​shartnoma olib kelmading»​ kabi o‘ylab topilgan bahonalarni takrorlash holatiga chek qo‘yildi. Agar biron bir viloyatda mana shunday voqea yuz bersa, o‘sha hududdagi G‘aznachilik tarmog‘i rahbarini lavozimidan olib tashlashni iltimos qilamiz»​, deb qo‘shimcha qilgan Jamshid Qo‘chqorov.