«Hokimning aybi bo‘lsa, menga yozasizlar». Prezident hokimlarning vakolatlari haqida gapirdi

Parlamentga murojaatnomada prezident hokimlarning ijro hokimiyati va vakolatlariga to‘xtalib o‘tdi. 

«Keyingi paytda xalq deputatlari kengashlarining rolini, xalq noiblari vakolatlari tubdan oshirildi. Siyosiy partiyalarning mahalliy hokimiyat idoralarining shakllantirish borasida vakolatlari borasida bosqichma-bosqich kengaytirildi. Deputatlik nazorati esa mustahkamlandi. Biroq ochiq tan olish kerak, hokimlarning ham mahalliy kengashlarga, ham ijro hokimiyatiga rahbarlik qilishi demokratik prinsiplarga mos keladi, deb bo‘lmaydi. Hech qayerda bunday narsa yo‘q», dedi prezident.

Shu bilan birga hokim prezidentning vakili va himoyasida ekani qayd etib o‘tildi.

«Hokim prezidentning vakili. Hokimning aybi bo‘lsa, menga yozasizlar. Biz o‘zimiz chora ko‘ramiz, kerak bo‘lsa jinoiy javobgarlikka tortamiz.

Kim hokimni qamab qo‘yib, keyin prezidentga xat yozsa, uning o‘zi jinoiy javobgarlikka tortiladi. Shuni hamma bilib qo‘ysin.

Prezidentning vakili hamma joyda birinchi bo‘ladi. Uning aytganini hamma qilishi kerak. Endi bo‘ldi, prezidentning vakolatiga kiradigan kadrlar tergovga chaqirilmaydi, birontasi chaqirilsa, o‘zim uni o‘sha kuni jinoiy javobgarlikka tortaman», dedi Shavkat Mirziyoyev.