«Juda katta marra olganmiz»

O‘zbekiston Respublikasi prezidenti Shavkat Mirziyoyev Simpoziumlar saroyida o‘tkazilayotgan yig‘ilishda O‘zbekiston Respublikasi Oliy Majlisiga murojaat qilmoqda. Marosim «O‘zbekiston 24» telekanalida jonli ravishda efirga uzatilmoqda.

Prezident o‘tgan yil davomida qilingan ishlar haqida gapirdi.

«Juda katta marra olganmiz. 25 yilda qilinmagan ishlar marrasini olganmiz.

Bizning siyosatda oyog‘imizga kishan bo‘lgan bitta masala bor – noreal raqamlar ortidan quvish. Endi amaliy natijadorlik, inson manfaatlari islohotlarning bosh maqsadi etib belgilandi.

Hozir juda ko‘p ishlarni Jahon banki, Xalqaro valyuta jamg‘armasi bilan qilmoqdamiz. Jahon hamjamiyati bilan statistikamizni to‘g‘irlab olishimiz kerak. 8-10 foiz degan balandparvoz gaplar kimga foyda berdi? 10 foizni necha marta tekshirtirdim.

Darrov bir yilda hamma narsani qilib bo‘lmaydi. Buni bilimli, ilmli odamlar qiladi. Oltin valyuta zaxiralari bir yilda 1,1 mlrd dollarga ko‘paydi. Ko‘paygani davlatimiz qudratidan dalolat. Hech qaysi tadbirkor kerak emas mahsulot olib kelmaydi, eksportbop, raqobatbardosh mahsulot olib keladi», dedi prezident.

Prezident, shuningdek, ayollarning muammolarini eslatib o‘tdi.

«Ayollar orasida o‘z joniga qasd qilish yil, kun emas, soat sayin oshmoqda. Xotin-qizlar qo‘mitasi nega jim? Bong urishi kerak ular. «Mahalla» bo‘yicha ham hali o‘zgarishlar bo‘ladi. Oylik tizimi mos kelmayotgani ko‘rinib turibdi. Buni to‘g‘ri tushunaman. Qolaversa, ishlaganimizga hali endi bir yil bo‘lmoqda», dedi prezident.