Prezident XMI bilan hamkorlik bo‘yicha boshqaruvchilar va ularning o‘rinbosarlarini tayinladi
|21:23 / 23.12.201720 59010 min
Foto: Prezident matbuot xizmatiFoto: Prezident matbuot xizmati
O‘zbekiston Respublikasi prezidenti Shavkat Mirziyoyev 2017 yil 20 dekabr kuni «Xalqaro va xorijiy moliya institutlari bilan hamkorlikning samaradorligini yanada oshirish chora-tadbirlari to‘g‘risida»gi qarorni imzoladi.
Hujjatda qayd etilishicha, mamlakatni jadal ijtimoiy-iqtisodiy rivojlantirishga qaratilgan loyihalarni amalga oshirish bo‘yicha xalqaro va xorijiy moliya institutlari bilan hamkorlik izchil rivojlanmoqda.
Shu bilan birga, mazkur sohada ayrim davlat boshqaruvi organlari vakolatlarining aniq belgilab qo‘yilmaganligi va funksiyalarining takrorlanishi moliya institutlari bilan hamkorlikni yanada faollashtirishga to‘sqinlik qilmoqda.
O‘zbekiston Respublikasi Vazirlar Mahkamasi huzuridagi Xalqaro moliya institutlari, tashkilotlari va donor mamlakatlar bilan hamkorlik qilish, yirik va strategik muhim investitsiya loyihalarini amalga oshirish masalalari bo‘yicha idoralararo kengash tomonidan qarz, kredit va grant mablag‘larini jalb qilish va ulardan foydalanish borasidagi ishlarning tashkil etilishi vakolatli davlat organlarining mas'uliyati va tashabbuskorligini pasaytiradi, ortiqcha byurokratik tartib-taomillar va xarajatlarga olib keladi.
Qarz, kredit va grant mablag‘larini jalb etish, yetakchi moliya institutlari bilan hamkorlik qilish uchun qulay shart-sharoitlarni shakllantirish borasidagi faoliyatni muvofiqlashtirishning samarali va zamonaviy talablarga javob beradigan tizimini yaratish maqsadida:
1. O‘zbekiston Respublikasidan quyidagilar:
O‘zbekiston Respublikasining Investitsiyalar bo‘yicha davlat qo‘mitasi — moliya institutlari bilan markazlashtirilgan hamkorlik bo‘yicha vakolatli organ (boshqaruvchi idorasi);
O‘zbekiston Respublikasi Bosh vazirining o‘rinbosari S.R. Xolmurodov — Osiyo taraqqiyot banki, Osiyo infratuzilma investitsiyalari banki, Jahon banki guruhi, Islom taraqqiyot banki guruhi, Yevropa tiklanish va taraqqiyot banki hamda boshqa moliya institutlari bilan markazlashtirilgan hamkorlik bo‘yicha boshqaruvchi;
O‘zbekiston Respublikasining Investitsiyalar bo‘yicha davlat qo‘mitasi raisi — Osiyo taraqqiyot banki, Osiyo infratuzilma investitsiyalari banki, Jahon banki guruhi, Islom taraqqiyot banki guruhi, Yevropa tiklanish va taraqqiyot banki hamda boshqa moliya institutlari bilan markazlashtirilgan hamkorlik bo‘yicha boshqaruvchi o‘rinbosari;
Mavzuga oid
O‘zbekiston Respublikasi Markaziy banki — Xalqaro valyuta fondi bilan markazlashtirilgan hamkorlik bo‘yicha vakolatli organ (boshqaruvchi idorasi);
O‘zbekiston Respublikasi Bosh vazirining o‘rinbosari — O‘zbekiston Respublikasi moliya vaziri J.A. Kuchkarov — Xalqaro valyuta fondi bilan markazlashtirilgan hamkorlik bo‘yicha boshqaruvchi;
O‘zbekiston Respublikasi Markaziy banki raisi — Xalqaro valyuta fondi bilan markazlashtirilgan hamkorlik bo‘yicha boshqaruvchi o‘rinbosari etib belgilandi.
tegishli moliya institutlari bilan hamkorlikni amalga oshirish;
moliya institutlari bilan hamkorlikning ustuvor yo‘nalishlari, «yo‘l xarita»lari va dasturlari, shuningdek, iqtisodiyot tarmoqlari, respublika hududlarini rivojlantirish uchun moliya institutlarining jalb etiladigan qarz, kredit va grant mablag‘laridan yanada samaraliroq foydalanish bo‘yicha takliflar ishlab chiqish;
moliya institutlari ishtirokidagi loyihalarni ro‘yobga chiqarish uchun mas'ul bo‘lgan vazirlik va idoralar, loyihalarni amalga oshirish guruhlari, ekspertiza organlarining faoliyatini muvofiqlashtirish, shu jumladan loyiha, tender va kontraktga oid hujjatlar bo‘yicha ekspert xulosalarining o‘z vaqtida taqdim etilishini nazorat qilish;
moliya institutlarining jalb etiladigan qarz, kredit va grant mablag‘laridan samarali foydalanish bo‘yicha tavsiyalar ishlab chiqish;
chet el investitsiyalari ishtirokidagi loyihalarni amalga oshirishning borishi ustidan monitoring o‘tkazish;
O‘zbekiston Respublikasi Vazirlar Mahkamasiga har chorakda moliya institutlari bilan hamkorlik dasturlarining amalga oshirilishi holati haqida hisobot taqdim etish;
moliya institutlari bilan investitsion hamkorlik masalalari bo‘yicha O‘zbekiston Respublikasining xalqaro shartnomalarini tayyorlash, kelishish va imzolashda o‘rnatilgan tartibda ishtirok etish;
moliya institutlari missiyalarining ishchi uchrashuvlari jadvalini ishlab chiqish va tasdiqlash;
O‘zbekiston Respublikasida va xorijda moliya institutlari vakillari ishtirokida xalqaro konferensiyalar, seminarlar, investitsion forumlar o‘tkazilishini tashkil etish.
3. Boshqaruvchilar idoralariga quyidagi huquqlar berildi:
vazirlik va idoralar tomonidan rioya etilishi majburiy bo‘lgan moliya institutlari missiyalarining ishchi uchrashuvlari jadvalini tasdiqlash;
moliya institutlari bilan o‘zaro hamkorlik jarayonida yuklatilgan vazifalarni bajarish uchun zarur bo‘lgan xat-xabarlar, memorandumlar, bayonnomalar va boshqa hujjatlarni O‘zbekiston Respublikasi nomidan imzolash;
davlat va xo‘jalik boshqaruvi organlaridan o‘rnatilgan tartibda boshqaruvchi idorasi vakolatiga taalluqli axborotlarni so‘rab olish;
zaruratga ko‘ra, tanlov o‘tkazish jarayonlari, loyiha va tender hujjatlarini ekspertizadan o‘tkazish muddatlarini uning yuqori sifatini ta'minlagan holda tezlashtirish, shuningdek, moliya institutlari bilan kelishuv bo‘yicha ularning mablag‘larini tegishli loyihalar komponentlari o‘rtasida qayta taqsimlash haqida O‘zbekiston Respublikasi Vazirlar Mahkamasiga takliflar kiritish;
O‘zbekiston Respublikasi Prezidenti huzuridagi Loyiha boshqaruvi milliy agentligi bilan kelishgan holda, chet el investitsiyalari ishtirokidagi loyihalar qismida — O‘zbekiston Respublikasi Investitsiyalar bo‘yicha davlat qo‘mitasi va loyiha tashabbuskorining qo‘shma taqdimnomasiga asosan Vazirlar Mahkamasiga tegishli rivojlanish konsepsiyasi doirasida rivojlanish davlat dasturiga aniqlik kiritish;
O‘zbekiston Respublikasi Vazirlar Mahkamasi bilan kelishgan holda moliya institutlaridagi O‘zbekiston Respublikasining doimiy vakillarini tasdiqlash va ularni lavozimdan ozod etish;
moliya institutlari ishtirokida loyihalarni ro‘yobga chiqarish uchun mas'ul bo‘lgan vazirliklar, idoralar va loyihalarni amalga oshirish guruhlari mansabdor shaxslari hisobotlarini eshitish, loyihalar ijrochilarini taklif etgan holda ularning o‘z vaqtida va samarali amalga oshirilishini ta'minlash bo‘yicha chora-tadbirlarni ishlab chiqish.
4. Moliya institutlari bilan realizatsiya qilinayotgan loyihalarni amalga oshirish guruhlarining rahbarlarini loyihaning ro‘yobga chiqarilishi bo‘yicha mas'ul bo‘lgan vazirliklar va idoralar rahbarlari tomonidan boshqaruvchi idorasi bilan kelishgan holda lavozimga tayinlash va ozod etish tartibi belgilandi.
5. O‘zbekiston Respublikasi Investitsiyalar bo‘yicha davlat qo‘mitasiga O‘zbekiston Respublikasi Prezidenti huzuridagi Loyiha boshqaruvi milliy agentligi bilan kelishgan xolda, alohida buyurtmachilar yuzasidan davlat kapital mablag‘lari limitlarini qayta taqsimlash qismida — O‘zbekiston Respublikasi Moliya vazirligi va loyiha tashabbuskorining qo‘shma taqdimnomasiga asosan Vazirlar Mahkamasiga tegishli rivojlanish konsepsiyasi doirasida rivojlanish davlat dasturiga aniqlik kiritish huquqi berildi.
6. O‘zbekiston Respublikasining Bosh vaziri A.N. Aripovga O‘zbekiston Respublikasi nomidan moliya institutlariga tasdiqlangan boshqaruvchilar va boshqaruvchilarning o‘rinbosarlari xususida vakolat-xati yuborish vakolati berildi.
7. O‘zbekiston Respublikasi Investitsiyalar bo‘yicha davlat qo‘mitasi va Markaziy banki:
ikki oy muddatda boshqaruvchi idoralarining reglamentini ishlab chiqishni va to‘liq faoliyat ko‘rsatishini;
moliya institutlarining moliyaviy va texnik ko‘magidagi loyihalar ro‘yxatining rasmiy veb-saytda o‘z vaqtida chop etilishini, moliya institutlarining qarzlari, kreditlari va grantlarini jalb qilish bo‘yicha tizimli ishlarni amalga oshirishni;
moliyalashtirish manbalarini o‘rganish hamda kreditlar, qarzlar va grantlarni jalb qilish bo‘yicha davlat va xo‘jalik boshqaruvi organlari, mahalliy davlat hokimiyati organlari, shuningdek, O‘zbekiston Respublikasining xorijdagi diplomatik vakolatxonalari faoliyatining samaradorligi va natijadorligini muntazam ravishda baholashni;
moliya institutlari ishtirokidagi loyihalarni jalb etish va amalga oshirilishini monitoring qilish sohasida bajarilgan ishlar to‘g‘risidagi ma'lumotlarning har chorakda O‘zbekiston Respublikasi Vazirlar Mahkamasiga taqdim etilishini ta'minlaydi.
8. Boshqaruvchi idorasining faoliyatini tashkil etish uchun O‘zbekiston Respublikasi Investitsiyalar bo‘yicha davlat qo‘mitasi markaziy apparatining shtatlar soni 10 ta birlikka ko‘paytirildi.
Moliya vazirligi va O‘zbekiston Respublikasi Investitsiyalar bo‘yicha davlat qo‘mitasi bir oy muddatda mazkur qarorga muvofiq O‘zbekiston Respublikasi Investitsiyalar bo‘yicha davlat qo‘mitasining xarajatlar smetasi va shtatlar jadvaliga o‘zgartirishlar kiritadi.
9. O‘zbekiston Respublikasi Vazirlar Mahkamasining 2009 yil 12 avgustdagi «Xalqaro moliyaviy institutlar, xorijiy hukumat moliyaviy tashkilotlar va donor mamlakatlar mablag‘larini jalb qilish va ulardan samarali foydalanish tizimini takomillashtirish chora-tadbirlari to‘g‘risida»gi 229-son qarori o‘z kuchini yo‘qotgan deb hisoblanadi.
10. O‘zbekiston Respublikasi Investitsiyalar bo‘yicha davlat qo‘mitasi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risidagi takliflarni O‘zbekiston Respublikasi Vazirlar Mahkamasiga kiritadi.
11. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Bosh vazirining o‘rinbosarlari S.R. Xolmurodov, J.A. Kuchkarov va O‘zbekiston Respublikasi Prezidenti huzuridagi Loyiha boshqaruvi milliy agentligi direktori Sh.M. Sadikov zimmasiga yuklandi.
