БМТ Бош котиби Антониу Гутерриш ўзининг янги йил табригида «қизил тревога» ҳақида эълон қилди. У инсоният қаршисида турган бош таҳдидларни санаб ўтган.

ТАСС хабарига кўра, у биринчи навбатда дунёдаги тинчликка ядровий қуроллар таҳдид солиб турганини қайд этган. У айни вақтда бу таҳдид совуқ уруш давридан кейинги энг юқорига чиққанини эътироф этган.

«Иқлим тез ўзгармоқда, нотенглик ўсмоқда. Биз инсон ҳуқуқлари даҳшатли даражада бузилиши ҳолатларига гувоҳ бўлдик, миллатчилик ва ўзгаларга тоқатсизлик ўсмоқда», — дея қўшимча қилган Гутттериш.

Унинг сўзларига кўра, дунё ортга қадам ташлади. У дунёдаги хавфсизликни таъминлаш учун жаҳон давлатлари етакчилари бирлашиши лозимлигини қайд этди.

Декабрь ойи ўрталарида The National Interest журнали Учинчи жаҳон уруши бошланиши мумкин бўлган бешта минтақани санаб ўтганди. Бу рўйхат америкалик профессор, мудофаа ва миллий хавфсизлик масалалари бўйича мутахассис Роберт Фарли томонидан тузилганди. Унинг фикрича, ҳозирда энг хавфли ҳудуд Корея ярим оролидир. Кейинги ўринларда Тайвань, Украина, Туркия ва Форс кўрфази номлари саналган.