АҚШ президенти Дональд Трамп маълум қилдики, бир неча кундан буён оммавий намойишлар ўтказаётган Эрон халқи ниҳоят «бешафқат ва бузуқи» ҳокимиятга қарши турмоқда.

«Эрон халқи ва ниҳоят шафқатсиз ва бузилган режимга қарши чоралар кўрмоқда», дея ёзди Оқ уй раҳбари твиттердаги саҳифасида.

У шунингдек, «Президент Барак Обама маъмурияти даврида Эронга берилган барча пуллар терроризмни қўллаш учун сарфлангани»ни қайд этиб ўтган.

«Одамларда овқат йўқ, катта инфляция юзага келган, одамларнинг ҳуқуқлари топталган. АҚШ барчасини кузатиб бормоқда!», дея ёзган президент.

Эронда ҳукуматга қарши намойишлар 28 декабрь куни мамлакатдаги энг йирик шаҳарлардан бири Машҳадда бошланганди. 200 нафар кишидан иборат акция иштирокчилари тухум нархлари кескин кўтарилишидан норозилик билдиришганди. Полиция акция иштирокчиларининг 52 нафарини ҳибсга олгач, 29 декабрь куни мамлакатнинг бошқа йирик шаҳарларида ҳам намойишлар тўлқини кўтарилди.

Ўтган вақт давомида полиция билан бўлиб ўтган тўқнашувлар давомида камида 20 киши ҳалок бўлди, ҳукумат 450 нафардан ортиқ намойишчини қўлга олди. Ҳукумат қўлга олинганларни қаттиқ жазо кутаётганини маълум қилди.

Душанба куни Ислом инқилоби соқчилари корпуси расмий вакили маълум қилдики, полиция ва хавфсизлик кучлари кўп жойларда вазиятни қўлга олган. 

Миллий хавфсизлик бўйича олий кенгаш котиби Али Шамхоний мамлакатдаги норозилик акциялари Теҳрон билан қатор давлатлар олиб бораётган «бевосита уруш» доирасида бўлиб ўтаётгани ҳақида маълум қилди. У Эрондаги норозилик намойишлари ортида АҚШ, Буюк Британия ва Саудия Арабистони турганини таъкидлаб ўтди.