Kaliforniyada yashovchi amerikalik juftlik 13 farzandini zanjirband holda ushlab turgani aniqlandi. Bu haqda mahalliy politsiya ma'lum qildi.
Politsiyada ma'lum qilinishicha, 14 yanvarda bolalardan biri qochishga muvaffaq bo‘lgan va shundan keyin politsiya bilan bog‘lanib, ota-onasi uning aka-singillarini zanjirband holda ushlab turganini ma'lum qilgan. Politsiyachilar juftlikning uyiga kelganda karaxt holga soluvchi vaziyatning guvohi bo‘lishgan: bir necha bola qorong‘i va badbo‘y xonada zanjirband holda bo‘lganlar. Juftlik nima uchun farzandlarini bunday xo‘rlaganining sababini tushuntirib bera olmagan.
Politsiyada ma'lum qilinishicha, bolalarning yoshlari 2 yoshdan 29 yoshgacha. Ularning barchasi politsiya bo‘limiga yetkazilib, so‘roq qilinganlar. Juftlik hibsga olingan, ular qiynoqqa solishda va bolalar bilan shafqatsiz munosabatda bo‘lishda ayblanmoqdalar.
Hozirda jabrlanuvchilar tibbiy ko‘rikdan o‘tish uchun shifoxonalarga jo‘natilganlar.
