Suriya Turkiya samolyotlarini urib tushirishga tayyorligini ma'lum qildi

Suriya tashqi ishlar vaziri o‘rinbosari Feysal Mikdadning ma'lum qilishicha, mamlakat qurolli kuchlari Suriya hududi uzra jang qiladigan Turkiya qiruvchilarini urib tushiradi. Bu haqda Associated Press xabar bermoqda.

Diplomat Anqara Suriya shimolida, Turkiya bilan chegara yaqinida kurdlarga qarshi harbiy harakatlarni boshlayotgani haqida tarqalgan xabarlar fonida shunday bayonot bilan chiqdi.

Mikdadning so‘zlariga ko‘ra, Damashq Turkiya qo‘shinlarining kurd tuzilmalariga istalgan hujumini «tajovuzkorlik akti» hamda xalqaro qonunchilikning buzilishi sifatida baholaydi.

Eslatib o‘tamiz, avvalroq Turkiya armiyasi oshirilgan jangovar tayyorgarlik holatiga keltirilgani xabar berilgandi.