O‘zbekiston Mudofaa vazirligi Markaziy harbiy klinik gospitalida kapital ta'mirdan chiqqan oshxonaning tantanali foydalanishga topshirish marosimi bo‘lib o‘tdi. Tadbirda Mudofaa vazirining o‘rinbosari polkovnik Azizbek Ikromov, gospital tibbiy personali ishtirok etdi, deb xabar qilmoqda vazirlik matbuot xizmati.
Ta'mirlash va qayta jihozlash ishlariga 2 milliard 150 million so‘m mablag‘ sarflandi. Shundan 850 million so‘mga 40 ta zamonaviy ovqat tayyorlash va saqlash uskunasi olib kelingan. Oshxonada bir vaqtning o‘zida 600 kishiga parhez taomlar tayyorlash imkoniyati mavjud.
Bundan tashqari, oshxonada autsorsing tizimi joriy etilgan bo‘lib, unda “Bunyod baraka biznes” xususiy korxonasi oziq-ovqat mahsulotlarini xarid qilish, ularga ishlov berish, taom tayyorlash va bemorlarga yetkazib berish jarayonlarini amalga oshiradi.
Mazkur oshxonada oziq-ovqat maxsulotlariga ishlov berish, ularni saqlash va taom tayyorlash uchun alohida joylar ajratilgan bo‘lib, taomlarning sifatini saqlash uchun yuqori texnologik jihozlar va idish-tovoqlardan foydalaniladi.
