Bemorga qo‘pollik qilgan tibbiyot xodimlari vazifasidan ozod qilindi

Joriy yilning 5 fevral kuni Sog‘liqni saqlash vazirligining navbatdan tashqari hay'at yig‘ilishi  bo‘lib o‘tdi. Videoselektor tarzida o‘tgan yig‘ilishda Qoraqalpog‘iston Respublikasi sog‘liqni saqlash vaziri, Toshkent shahar Sog‘liqni saqlash Bosh boshqarmasi va viloyatlar Sog‘liqni saqlash boshqarmasi boshliqlari, Respublika tasarrufidagi davolash-profilaktika muassasasi rahbarlari, oliy o‘quv yurtlari rektorlari hamda ixtisoslashtirilgan tibbiyot markazlari direktorlari ishtirok etdi. Bu haqda Sog‘liqni saqlash vazirligi axborot xizmati xabar berdi.

Yig‘ilish sog‘liqni saqlash vaziri A.Shodmonov raisligida o‘tkazildi.

Prezident Shavkat Mirziyoyev rahbarligida sog‘liqni saqlash sohasi mutasaddilari bilan bo‘lib o‘tgan videoselektor yig‘ilishlarda shifoxonalardagi holatlar, tibbiyot xodimlarining kasbiy etikasi va aholining ehtiyojlari va haqli talablariga befarq munosabatda bo‘layotgan ayrim rahbar xodimlar mas'uliyatini oshirishda ijro intizomi va nazorati alohida o‘rin tutishi ta'kidlangandi. 

Shu munosabat bilan Hay'at yig‘ilishining birinchi masalasi aholidan kelib tushayotgan murojaatlar tahliliga bag‘ishlandi.  Ta'kidlanganidek, Prezident  virtual qabulxonasiga kelayotgan murojaatlarning tibbiyotga tegishli qismi o‘rganilganda, ularning 12,6 foizi aynan sog‘liqni saqlash xodimlari harakati, bemor va uning qarindoshlariga nisbatan qo‘pol muomalada bo‘linayotgani haqida ekani ma'lum bo‘ldi.

Xususan, Toshkent shahar I.Irgashev nomli 4-son klinik shifoxonasi travmatologiya bo‘limida davolanayotgan bemor tomonidan yuborilgan murojaat o‘rganilganda ham shifoxonada ayni shu kamchiliklarga yo‘l qo‘yilayotgani aniqlandi. Bemor va uning qarindoshlari bilan o‘tkazilgan suhbat jarayonida shifoxonaning travmatologiya bo‘limi mudiri T.Tog‘ayev va hamshira M.Tolipova haqiqatan ham tibbiyot xodimi deontologiyasi talablarini qo‘pol ravishda buzib kelgani ma'lum bo‘ldi. 

— Bugun biz Prezidentimiz Shavkat Mirziyoyev boshchiligida yangicha ishlash tizimiga o‘tayapmiz. Ya'ni ishimizga bahoni xalq beradigan,  xalq davlat idoralariga emas, davlat idoralari xalqimizga xizmat qiladigan tizimga, — dedi sog‘liqni saqlash vaziri A.Shodmonov.  — Hayotning o‘zi oldimizga eng asosiy maqsad –  inson manfaatlarini har tomonlama ta'minlash masalasini dolzarb vazifa qilib qo‘ymoqda. Davlatimiz rahbarining qat'iy talabi ham shu. Har bir rahbar xodim xalq dardi, xalqning hayotiy muammo va ehtiyojlarini yaxshi bilishi shart. Shu kabi holat boshqa tibbiyot muassasalarida ham sodir bo‘lmasligi, barcha o‘ziga tegishli xulosa chiqarishi uchun  mazkur masala muhokamasini bugungi navbatdan tashqari bo‘layotgan hay'at yig‘ilishimizning bosh masalasi sifatida olib chiqdik.  

Yuqorida ko‘rsatilgan kamchiliklarga yo‘l qo‘yilganligi hamda shifoxonada ma'naviy muhit buzilganligi, tibbiyot xodimlari o‘rtasida etika, deontologiya masalalari talabga javob bermaganligi  uchun Toshkent shahar I.Irgashev nomli 4-son klinik shifoxonasi bosh shifokori S.Alimov, shifoxonaning bosh hamshirasi Sh.Alimova, travmatologiya bo‘limi mudiri T.Tog‘ayev va travmatologiya bo‘limi hamshirasi M.Tolipovalar o‘z vazifalaridan ozod etildi.

Yig‘ilish yakunida har bir tibbiyot xodimining asosiy vazifasi aholi salomatligini yanada yaxshilash, oilalarga kirib borgan holda muloqot o‘rnatish, kafolatlangan hamda boshqa tibbiy xizmat turlarining o‘z vaqtida va ko‘ngildagidek ko‘rsatilishini ta'minlash ekani yana bir bor ta'kidlandi. Tibbiyot xodimi faoliyati samarasi xalq fikri orqali baholanadigan tizim shakllantirish, bunda tibbiyotning barcha bo‘g‘inini kompleks rivojlantirish lozimligiga e'tibor qaratildi.