Qarshidagi aeroport milliy aviakompaniya monopoliyasidan chiqariladi

Turizmni rivojlantirish davlat qo‘mitasi Qarshi shahridagi xalqaro aeroportni rivojlantirish konsepsiyasini ishlab chiqadi, unga ko‘ra, aeroport boshqaruvi xususiy qo‘lga o‘tishi mumkin. Bu O‘zbekiston prezidentining «Kirish turizmini rivojlantirish chora-tadbirlari to‘g‘risida»gi qarorida belgilangan.

Hujjatga ko‘ra, «Qarshi» xalqaro aeroporti «O‘zbekiston havo yullari» Milliy aviakompaniyasi tasarrufidan chiqariladi va aeroport hududida «ochiq osmon» tamoyili joriy qilinadi.

Tegishli konsepsiya 1 iyulga qadar xalqaro tajribalarni o‘rganish asosida ishlab chiqiladi.

«2018 yil 1 iyulgacha bo‘lgan muddatda «O‘zbekiston havo yo‘llari» MAK, O‘zbekiston Respublikasi Parvozlar xavfsizligini nazorat qilish davlat inspeksiyasi va Qashqadaryo viloyati hokimligi bilan birgalikda ilg‘or xorijiy tajribani o‘rganish asosida «Qarshi» xalqaro aeroportini «O‘zbekiston havo yo‘llari» MAKning tarkibidan chiqarib, xalqaro aeroportlarni boshqarish bo‘yicha maxsus kompaniya boshqaruviga berish, aeroport hududida «Ochiq osmon» rejimini, shu jumladan, loukoster aviakompaniyalarini jalb qilgan holda joriy qilishni nazarda tutuvchi «Qarshi» xalqaro aeroportini rivojlantirish konsepsiyasini O‘zbekiston Respublikasi Vazirlar Mahkamasiga kiritsin», deyilgan hujjatda.