Ukrainaning tashqi ishlar vaziri Pavel Klimkinning ma'lum qilishicha, har yili mamlakatdan bir millionga yaqin ukrainaliklar chiqib ketmoqda. Bu haqda u ICTV telekanali efirida aytib o‘tdi.
«Bizda haqiqatdan falokatli vaziyat - har yili taxminan bir millionga yaqin ukrainaliklar mamlakat tark etmoqda», - deya aytib o‘tdi Klimkin.
Shu bilan birga, vazirning so‘zlariga ko‘ra, ushbu tendensiya yaqin vaqt ichida saqlanib qoladi. Shuningdek, Klimkinning ta'kidlashicha, faqatgina Polshada 1,4 mln ukrainalik istiqomat qilmoqda.
Eslatib o‘tamiz, avvalroq Pavel Klimkin Ukraina hududida NATO bazalari joylashtirilishi mumkinligi haqidagi savolga javob bergandi.
Uning ma'lum qilishicha, Ukraina NATO va Yevropa ittifoqiga a'zo bo‘lishidan oldin Konstitutsiyani o‘zgartiradi. Uning so‘zlariga ko‘ra, konstitutsiyaviy tuzatishlarda mamlakat hududida harbiy bazalarni joylashtirish masalasi «belgilab beriladi».
