18 sentabr kuni soat 08:30 atrofida Buxoro viloyati Kogon tumani hududidan o‘tuvchi Buxoro-Qorovulbozor magistral yo‘lida harakatlangan yo‘lovchi avtobusida noxush hodisa ro‘y berdi.
Favqulodda vaziyatlar vazirligi «Kun.uz»ga ma'lum qilishicha, avtobusdagi gaz balloni portlashi natijasida 4 yo‘lovchi voqea joyida, 1 kishi esa shifoxonada vafot etgan.
Avtobusda jami 26 kishi bo‘lgan.
Sog‘liqni saqlash vazirligi ma'lumotiga ko‘ra, ayni vaqtda ahvoli og‘ir bo‘lgan 5 nafar bemor Respublika shoshilinch tibbiy yordam ilmiy markazi (RShTYoIM) Buxoro filialiga yotqizilgan. Yana 7 nafar bemorning ahvoli o‘rta og‘irlikda, 9 nafarining ahvoli yengil bo‘lib, ular Kogon shahar tibbiyot birlashmasi shoshilinch tez tibbiy yordam bo‘limiga yotqizilgan.
«Jarohatlanganlarga shoshilinch yordam ko‘rsatish uchun barcha zaruriy choralar ko‘rilib, RShTYoIMdan xirurg, neyroxirurg va reanimatolog mutaxassislari sanaviatsiya tarmog‘i orqali yuborilgan», deyiladi xabarda.
Hozirda jabrlanganlarning shaxsi to‘g‘risidagi ma'lumotlar aniqlanmoqda.
Avtohalokat sabablarini o‘rganish bo‘yicha hukumat komissiyasi tuzilgan.
