Bugun, 15 yanvar kuni Toshkent shahar IIBB boshlig‘i Rustam Jo‘rayev ishtirokida OAV xodimlari bilan brifing bo‘lib o‘tdi. Tadbirda 2018 yil yakunlari bo‘yicha hisobotlar, jurnalistlarni qiziqtirgan savollarga javoblar berildi.
Rustam Jo‘rayev bergan ma'lumotlarga ko‘ra, poytaxtda 2018 yil davomida 2017 yilga nisbatan jami jinoyatlar soni 49,05 foizga kamaygan (2017 yilda 14 030ta, 2018 yilda 7 148ta). Shu jumladan, qotillik 69tadan 61taga (-11,6 foiz), og‘ir tan jarohati yetkazish 203tadan 152taga (-25,1 foiz), nomusga tegish 41tadan 14taga (-65,9 foiz), talonchilik 245tadan 120taga (-51 foiz), bosqinchilik 136tadan 64taga (-52,9 foiz), o‘lim bilan bog‘liq YTHlar 194tadan 128taga (-34 foiz), qidiruvda bo‘lgan shaxslar 3219 nafardan 1534 nafarga (-52,3 foiz) kamayishiga erishilgan.
Poytaxtda o‘rnatilgan mobil va statsionar radarlar qayd etgan qoidabuzarliklar ortidan 42 mlrd so‘mdan ortiqroq jarima undirilgan.
Kun.uz muxbirining «Jinoyatchilik ko‘rsatkichlari bu qadar tushishiga hisobga olish uslublari o‘zgartirilgani, ya'ni raqamlarni boshqarish sabab bo‘lmaganmi? 2018 yil va 2017 yil yakunlari bir xil usulda hisoblanganmi?», degan savoliga Toshkent shahar IIBB boshlig‘i Rustam Jo‘rayev shunday javob berdi:
– Jinoyatchilik ko‘rsatkichlarining bu qadar pasayishi o‘zimiz uchun ham kutilmagan hol bo‘ldi va bu ilmiy tadqiqotlar uchun arzirli ish deb hisoblayman. Bevosita savolga javob beradigan bo‘lsam – hech qanday uslublar o‘zgargani yo‘q, jinoyatchilik chindan ham kamaygan. Bunday yutuqlarga erishishimiz zamirida faqat jinoyatchiga emas, jinoyatni yuzaga keltiruvchi ijtimoiy omillarga – masalan ishsizlikka qarshi butun jamiyat bilan kurashishga kirishilgani sabab bo‘ldi, deb o‘ylayman. Bunda so‘nggi yillardagi islohotlarning ahamiyati katta.
Shuningdek, OAV xodimlari uchun prezident Shavkat Mirziyoyev tashrif buyurgan, poytaxtning Yunusobod tumanidagi, hozirda psixolog, xotin-qizlar bilan ishlash bo‘limi, yong‘in xavfsizligi bo‘limi va tezkor o‘t o‘chirish otryadi, post-patrul xizmati kabi bo‘limlarni o‘zida jamlagan zamonaviy ichki ishlar bo‘limi bo‘ylab ekskursiya uyushtirildi.
