Zangiotada binolari buzilgan o‘n nafar tadbirkor kompensatsiyani yana qancha kutishi kerak?

26 iyun kuni Kun.uz'da «Bir yildan beri sarsonmiz» – Zangiotada 10 nafar tadbirkor ikki hokimlik o‘rtasida «koptok» qilinmoqda» nomli maqola e'lon qilingan edi.

Unda Zangiota tumanidagi Eshonguzar qo‘rg‘onida qurilayotgan istirohat bog‘i o‘rnida tadbirkorlarga tegishli noturar binolar kompensatsiya masalasi to‘liq hal qilinmasdan turib buzib tashlangani, kompensatsiya o‘rniga berilgan yerga esa bu tadbirkorlar egalik qila olisholmayotgani aytilgandi.

Ushbu tadbirkorlar tahririyatimizga qayta murojaat qilishdi. Ularning ma'lum qilishicha, oradan 1 oydan oshiq vaqt o‘tganiga qaramay hamon muammo hal etilmagan.

Vaholanki, Zangiota tumani hokimining qurilish masalalari bo‘yicha o‘rinbosari Jasur Usmonaliyev holat yuzasidan Kun.uz'ga bergan izohida mavjud kamchiliklarni bir hafta ichida to‘g‘irlab, Toshkent viloyat hokimligiga taqdim qilishini aytib o‘tgan edi.

5 avgust kuni hokim o‘rinbosari Jasur Usmonaliyev bilan bog‘langanimizda tadbirkorlarga tegishli barcha hujjatlar tayyorlanib, viloyat hokimligiga topshirilgani, viloyatda maxsus komissiya ko‘rib chiqayotganini ma'lum qildi. Shundan so‘ng Toshkent viloyat hokimligi matbuot xizmatidan ham holat bo‘yicha izoh so‘radik.

«Zangiota tuman hokimligida muammo yo‘q. Ishlarni yakunlash viloyat hokimligida qolgan. Kerakli tashkilotlarga so‘rov yuborilgan va natijasi tez orada ma'lum qilinadi», deyiladi viloyat hokimligi matbuot xizmati izohida.

Turgan gapki, bu javob tadbirkorlarning xavotir va tashvishlarini aritgani yo‘q. Sababi deyarli bir yildan oshibdiki, har safar murojaat qilinganda shunday mazmunda javob olinadi. Masala bir oy avval tahririyat tomonidan o‘rganilganda «bir hafta ichida hal bo‘ladi» deyilib, ammo bir oydan buyon sudralayotgani ham tadbirkorlarning bu xavotirlari o‘rinli ekanini ko‘rsatmoqda.

Tadbirkorlarning mulklarini noqonuniy buzgan hokimlik o‘z aybini yuvish uchun ularga kompensatsiya sifatida berilgan yerni tezroq qonuniylashtirish o‘rniga, ishni paysalga solayotganini qanday tushinish mumkin?

Ishlari to‘xtab qolgan tadbirkorlarning ahvoli bugungi karantin davrida yanada og‘irlashmoqda. Ularning ko‘rgan moddiy zarari, behuda sarflangan vaqti va boy berilgan foydasi uchun kim javob beradi?

Mulkdorlar huquqlari bu tarzda paymol etilaverar ekan, mamlakatda xususiy mulk daxlsizligi va tadbirkorlarning huquqlari doimiy xatar ostida qolaveradi.

Rahmatillo Isroilov,
Kun.uz muxbiri