Yirik investitsiya loyihasi uchun eng yaxshi taklifni tanlab olish reglamenti o‘zgaradi

Vazirlar Mahkamasining “Yirik investitsiya loyihasini amalga oshirish uchun eng yaxshi taklifni tanlab olish ma’muriy reglamentiga o‘zgartirishlar kiritish to‘g‘risida”gi qarori loyihasi e’lon qilindi.

Qaror loyihasida hududlarni mutanosib rivojlantirish, yirik investitsiya loyihalarini amalga oshirish hisobiga yangi ish o‘rinlarini yaratish maqsadida, qiymati 10 mln dollardan ortiq bo‘lgan yirik investitsiya loyihalarini amalga oshirish uchun yer maydonlarini to‘g‘ridan to‘g‘ri ajratishda loyiha tashabbuskori tomonidan avvaldan maxsus hisobraqamga joylashtiriladigan loyiha qiymati 10 foiziga teng qismini kamida 1 foizga tushirish nazarda tutilgan.

Qoraqalpog‘iston investitsiya va ishbilarmonlik muhitini yaxshilash va yuqori qo‘shilgan qiymatga ega raqobatbardosh mahsulotlar ishlab chiqarishni kengaytirish maqsadida, Qoraqalpog‘iston hududida yirik investitsiya loyihasi uchun belgilangan loyiha qiymatini kamida 5 million AQSh dollari ekvivalentida belgilash mo‘ljallangan.

Bundan tashqari loyihada, Qoraqalpog‘iston hududida – 2022 yil 15 sentabrdan boshlab 2025 yil 1 yanvarga qadar Qoraqalpog‘iston investitsiyalar va tashqi savdo vazirligi ishchi organ deb belgilanishi nazarda tutilgan.