Hafta davomida sovuq ob-havo saqlanib turadi

"O‘zgidromet" xabariga ko‘ra, faqat Qoraqalpog‘iston Respublikasi, Xorazm, Buxoro, Navoiy viloyatlarida kam bulutli va quruq ob-havo kuzatiladi. Havo harorati kunduzi 3 daraja sovuq - 2 daraja iliq, shimolda 4-9 daraja  sovuq bo‘ladi.

Ertaga faqat respublika sharqiy hududlarida beqaror ob-havo saqlanib turadi. O‘zbekiston bo‘yicha yog‘ingarchilik kutilmaydi, faqat Farg‘ona vodiysi viloyatlarida, shuningdek, tog‘oldi va tog‘li hududlarda kechasi va kun birinchi yarmida qor yog‘adi. 

Havo harorati kechasi 5-10 daraja sovuq, kunduzi 3 daraja sovuq - 2 daraja iliq, respublika shimoliy hududlarida kechasi 13-15 daraja sovuq, ba’zi joylarda 20 daraja sovuqqacha, kunduzi 4-9 daraja sovuq atrofida bo‘ladi.

So‘ng ish haftasi oxirigacha O‘zbekiston bo‘yicha yog‘ingarchiliksiz ob-havo bo‘lishi kutilmoqda, faqat respublika janubi-sharqiy hududlarida, asosan tog‘oldi va tog‘li hududlarda 7-8 dekabr kunlari ba’zi joylarda biroz qor yog‘adi. 

Havo harorati kechalari 3-8 daraja sovuqni, ba’zi joylarda 10 daraja sovuqqacha, kunduz kunlari 3 daraja sovuq - 2 daraja iliqni, respublika shimoliy hududlarida kechasi 8-13 daraja sovuqni, ba’zi joylarda 15-20 daraja sovuqqacha, kunduz kunlari 2-7 daraja sovuqni tashkil etadi.

Respublika bo‘yicha ba’zi joylarga tuman tushadi, yo‘llarda yaxmalak hodisalari kuzatiladi.