So‘nggi kunlarda mehnat muhojirlari haqidagi gaplari shov-shuv bo‘lgan imomga «hayfsan» intizomiy jazosi ham berilgan.
16 may kuni O‘zbekiston musulmonlari idorasi Ichki nazorat komissiyasining navbatdagi yig‘ilishida «Shukrullo domla» sifatida tanilgan Farg‘ona viloyati Toshloq tumani bosh imomi va «Abu Hanifa» jome masjidi imom-xatibi Shukrullo Egamberdiyevning ijtimoiy tarmoqlardagi chiqishlari muhokama qilingan. Idora matbuot xizmatining ma’lum qilishicha, yig‘ilishda imom-xatibning e’tirozlarga sabab bo‘lgan chiqishlari va fikr-mulohazalari imomlik maqomiga to‘g‘ri kelmasligiga urg‘u qaratilgan.
«Sh.Egamberdiyev majlisda muhokamaga sabab bo‘lgan chiqishlarida xatoga yo‘l qo‘yganini e’tirof etdi va uzr so‘radi. Imom-xatib kelgusidagi faoliyatida bunday kamchiliklarga yo‘l qo‘ymasligini bildirdi. O‘z navbatida, mazkur xatti-harakatlarga nisbatan huquqiy baho berib, tegishli chora ko‘rilishi munosabati bilan imom-xatibni obro‘sizlantirish holatlaridan saqlanishni so‘raymiz.
Ichki nazorat komissiyasi bayon etilganlarni inobatga olib, Shukrullo Egamberdiyevga «hayfsan» intizomiy jazosi berish va Toshloq tumani bosh imomi vazifasidan ozod etish to‘g‘risida xulosa qildi», — deyiladi Musulmonlar idorasi bayonotida.
Musulmonlar idorasining Kun.uz'ga ma’lum qilishicha, Shukrullo Egamberdiyev «Abu Hanifa» jome masjidi imom-xatibi lavozimida qolgan.
Ma’lum qilinishicha, diniy idora tizimidagi Ichki nazorat komissiyasi – diniy soha xodimlari faoliyatini tartibga solish, kamchiliklarga yo‘l qo‘yganlarga ta’sir choralarini qo‘llash va halol-pok xizmat qilayotganlarni himoya qilish hamda rag‘batlantirish kabi vakolatlarga ega.
So‘nggi kunlarda imomning mehnat muhojirlari haqidagi gaplari shov-shuv va katta e’tirozlarga sabab bo‘layotgan edi.
Eslatib o‘tamiz, Shukrullo Egamberdiyev 2022 yil oktyabrida O‘zbekiston madaniyat vaziri, taniqli xonanda Ozodbek Nazarbekov bilan quda bo‘lgandi.
