Abu Rayhon Beruniy nomidagi xalqaro mukofot ta’sis etildi

«Abu Rayhon Beruniy nomidagi YuNeSKO – O‘zbekiston xalqaro mukofotini ta’sis etishni qo‘llab-quvvatlash to‘g‘risida» prezident qarori qabul qilindi.

Qarorga muvofiq, YuNeSKO bilan hamkorlikda sun’iy idrok sohasida odob-axloqni targ‘ib etish orqali ilmiy muloqotni rag‘batlantirish bo‘yicha Abu Rayhon Beruniy nomidagi YuNeSKO – O‘zbekiston xalqaro mukofotini ta’sis etish hamda Parij shahridagi YuNeSKO bosh qarorgohida 2023 yil 4–8 sentabr kunlari Abu Rayhon Beruniy hayoti va ijodiga bag‘ishlangan xalqaro ko‘rgazma va tadbirlarni yuqori saviyada o‘tkazish belgilandi.

2022 yilda «Buyuk mutafakkir va qomusiy olim Abu Rayhon Beruniy tavalludining 1050 yilligini xalqaro miqyosda keng nishonlash to‘g‘risida»gi prezident qarori ham qabul qilingan edi.

Unda, Fanlar akademiyasi bilan birgalikda Parij ko‘rgazmasiga taqdim etish uchun dunyo kutubxonalarida saqlanayotgan nodir qo‘lyozmalar nusxalaridan iborat maxsus katalogning ingliz va o‘zbek tillarida chop etilishini ta’minlash ham belgilab qo‘yilgan edi.