Konferensiya doirasida mintaqaviy xavfsizlik, terrorizmga qarshi kurash, humanitar yordam va mintaqaviy barqarorlik kabi masalalar ko‘rib chiqildi.
Toshkent shahridagi «O‘zbekiston» xalqaro forumlar saroyida Markaziy va Janubiy Osiyo davlatlari bosh shtab boshliqlarining konferensiyasi bo‘lib o‘tdi.
Mudofaa vazirligi xabariga ko‘ra, unda Amerika Qo‘shma Shtatlari, Pokiston, O‘zbekiston, Turkmaniston, Qozog‘iston, Qirg‘iziston va Tojikiston Mudofaa vazirliklari delegatsiyalari ishtirok etdi.
Tadbir avvalida harbiy delegatsiyalar vakillari «G‘alaba bog‘i» yodgorlik majmuasidagi «Matonat madhiyasi» monumenti poyiga gulchambarlar qo‘yib, «Shon-sharaf» muzeyini ko‘zdan kechirdi. Shundan so‘ng, «O‘zbekiston» xalqaro forumlar saroyida o‘z davlat bayroqlari oldida suratga tushdi.
Konferensiyani O‘zbekiston mudofaa vaziri general-leytenant Bahodir Qurbonov hamda AQSh Qurolli Kuchlari Markaziy qo‘mondonligi qo‘mondoni general Maykl Kurilla kirish so‘zlari bilan ochib berdi.
Konferensiya doirasida mintaqaviy xavfsizlik, terrorizmga qarshi kurash, humanitar yordam va mintaqaviy barqarorlik kabi masalalar ko‘rib chiqildi.
