«Omikron» XBB.1.5 varianti paydo bo‘lgach, «Sputnik» vaksinasi butunlay himoya qilishni to‘xtatdi, dedi Gamaleya markazi rahbari Aleksandr Ginsburg.
Koronavirusning «omikron» XBB.1.5 («kraken») varianti paydo bo‘lganidan so‘ng, pandemiya boshlanganidan ko‘p o‘tmay yaratilgan Rossiyaning «Sputnik» COVID-19 vaksinasi infeksiyadan «to‘liq» himoya qilishni to‘xtatdi. Bu haqda vaksina ishlab chiqilgan Gamaleya markazi rahbari Aleksandr Ginsburg 23 oktyabr, dushanba kuni «Gazeta»ga bergan intervyusida aytib o‘tdi.
Ginsburgning so‘zlariga ko‘ra, «Sputnik»ning asli dastlabki ikki yil davomida koronavirusdan himoya qilgan», ya’ni ro‘yxatdan o‘tgan payt - 2020 yil avgustidan boshlab 2022 yil iyuligacha. «2022 yilning yozi o‘rtalaridan boshlab, «omikron» 1, 2 va 3 variantlari paydo bo‘lganda «Sputnik V»ning samaradorligi sakkiz baravar kamaydi, «omikron» 4, 5 paydo bo‘lganda esa samaradorlik 20 baravar pasaydi», - deya qo‘shimcha qildi Ginsburg.
Rossiyada yangilangan «Sputnik» vaksinasi ishlab chiqilmoqda
Olim COVID-19 pandemiyasi davom etayotganiga ishora qilib, vaksinaning antigen tarkibini yangilash zarurligini ta’kidladi.
Hozirda Gamaleya markazi «omikron» XBB.1.5 variantiga qarshi kurashish uchun ishlab chiqilgan «Sputnik» vaksinasi yangi versiyasining klinik sinovlarini o‘tkazmoqda, dedi Ginsburg. Ushbu tadqiqotlar 10 dekabrda yakunlanishi rejalashtirilgan.
OAV ma’lumotlariga ko‘ra, yozdan beri dunyoda koronavirus bilan kasallanish darajasi oshib bormoqda. Biroq, kasallikdan o‘lim darajasi pastligi hisobga olinsa, dunyoning deyarli hamma joyida infeksiya tarqalishini ushlab turish uchun hech qanday cheklovlar yo‘q.
