NYT: Rossiyaga taqiqlangan mahsulotlar Marokash va Turkiya orqali yetkazib berilyapti

Amerikaning The New York Times gazetasiga ko‘ra, Xitoy va Marokash kompaniyalari Rossiyaga iqtisodiyotni qo‘llab-quvvatlash va Ukrainaga qarshi urushni davom ettirish uchun zarur bo‘lgan texnologik komponentlarni yetkazib berish bo‘yicha global taqiqlarni buzmoqda. Sanksiyalar qo‘llangandan so‘ng Rossiya Federatsiyasi Xitoy, Marokash va Turkiyadagi vositachilar tarmog‘i orqali telekommunikatsiya uskunalari va mikrochiplarni sotib olishni boshladi, deb yozadi 19 dekabr, seshanba kuni nashr rossiyalik amaldorlarning 4200 ta elektron xatlari, Rossiya kompaniyalari xodimlarining yozib olingan o‘zaro suhbatlari va savdo hujjatlariga tayanib. 

G‘arb firmalari mahsulotlari Marokash va Turkiya portlarida boshqa kemalarga qayta yuklanyapti

Ushbu hujjatlardan ma’lum bo‘lishicha, Rossiya tomonidan sotib olinayotgan taqiqlangan uskunalar va butlovchi qismlar bir qismi Marokashning Tanjyer-Med porti orqali yetkazib berilyapti, unda G‘arb kompaniyalari, xususan, Cisco, HP, Juniper, Ericsson va Nokia mahsulotlari boshqa kemalarga qayta yuklanyapti va Rossiya Federatsiyasiga jo‘natilyapti. Gazetaning ta’kidlashicha, xuddi shunday sxema NATOga a’zo Turkiya portlarida ham amalga oshirilmoqda.

Shu tarzda olingan tovarlar Rossiya onlayn-do‘konlarida ochiq sotilyapti. NYT ma’lumotlariga ko‘ra, Ukraina urushi boshlanganidan beri platformalardan biri AQSh kompaniyalaridan 100 million dollarga, birgina Xitoydan esa bu yil 150 million dollarga yuqori texnologiyali mahsulotlar sotib olgan. Boshqa narsalar qatorida, Rossiya telekommunikatsiya kompaniyalaridan biri ushbu portaldan Amerikaning Cisco ishlab chiqaruvchisidan ma’lumotlar uzatish uskunasini sotib olgan va uni «FSB»ning Yekaterinburgdagi boshqarmasiga o‘rnatdi, deb yozadi gazeta. 

Urush boshlanganidan beri Rossiya zarur texnologiyalarni olishni davom ettirdi

Jurnalistlar xulosa qilishicha, urush boshlanganidan buyon 22 oy davomida Rossiya umuman o‘z iqtisodiyotini qo‘llab-quvvatlash uchun zarur bo‘lgan texnologiyani olishda davom etgan. Sanksiyalar kiritilgandan so‘ng, savdoda uzilishlar kuzatildi, ammo rossiyalik yetkazib beruvchilar bo‘shliqlar va vaqtinchalik yechimlarni topdi, deyiladi ma’lumotda. Shu bilan birga, telekommunikatsiyalar, kuzatuv tizimlari, mikrochiplar, qurol tizimlari va dronlarni o‘z ichiga olgan deyarli har qanday tijorat uskunalarini yetkazib berishda katta qiyinchiliklar yo‘q, deb yozadi NYT.

Nashr tomonidan o‘rganilgan hujjatlar «rossiyalik sotuvchilar AQShning ularni xaridlardan chetlatishga urinishidan bir qadam oldinda borayotganini ko‘rish uchun kamdan-kam imkoniyatni taqdim etadi», deb ta’kidlaydi nashr.