Hujjatlar rasmiylashtirilib, pnevmatik qurol va unga tegishli qo‘rg‘oshin o‘qlar vaqtinchalik saqlovga olingan. Hozirda holat yuzasidan bojxona organlari tomonidan tergovga qadar tekshiruv harakatlari olib borilmoqda.
Samarqand xalqaro aeroportida Rossiyadan kelayotgan shaxsning yuklari orasidan pnevmatik qurol va uning 550 dona o‘qi topilgan. Bu haqda viloyat Bojxona boshqarmasi axborot xizmati xabar bermoqda.
Ma’lum qilinishicha, Samarqand xalqaro aeroportiga “Domodedovo-Samarqand” yo‘nalishidagi qatnov bilan uchib kelgan shaxs “yashil” yo‘lak orqali harakatlanib, bojxona nazoratidan o‘tayotganida xodimlar tomonidan to‘xtatilib, yo‘lovchining bagaj va qo‘l yuklari ko‘zdan kechirilgan.
Shunda yo‘lovchida bojxona deklaratsiyasida yozib ko‘rsatilmagan, og‘zaki so‘rovda ma’lum qilinmagan, tegishli hujjatlari bo‘lmagan, qiymati 3,1 mln so‘mlik 1 dona “MR-512” rusumli, 4,5 mm kalibrli pnevmatik qurol hamda unga tegishli 550 dona qo‘rg‘oshin o‘qlar va 1 dona optik nishonga olish asbobi borligi aniqlangan.
Qayd etilishicha, holat yuzasidan protsessual hujjatlar rasmiylashtirilib, pnevmatik qurol va unga tegishli qo‘rg‘oshin o‘qlar vaqtinchalik saqlovga olingan. Hozirda bojxona organlari tomonidan tergovga qadar tekshiruv harakatlari olib borilmoqda.
Ma’lumot uchun, pnevmatik quroldan ichki ishlar organlarining tegishli ruxsatnomalarisiz foydalanish, uni olish, saqlash, olib yurish, tashish, kolleksiyalash, ko‘rgazmaga qo‘yish, O‘zbekiston hududiga olib kirish yoki olib chiqish hamda O‘zbekiston hududi orqali tranzit olib o‘tish – qurolni musodara qilib, fuqarolarga BHMning 15 baravaridan 30 baravarigacha, mansabdor shaxslarga esa – 25 baravaridan 50 baravarigacha miqdorda jarima solishga yoki 15 sutkagacha ma’muriy qamoqqa olishga sabab bo‘ladi.
