Rossiya Federatsiyasi sudlari Ukrainaga qarshi urushdan qaytgan rossiyaliklarga nisbatan 2,6 mingta hukm chiqardi, biroq hukmlarning yarmidan ko‘pi yengillashtirildi, deb yozadi «Novaya gazeta. Yevropa».
Ukrainaga keng ko‘lamli hujum paytida, urushdan qaytgan yoki jangni davom ettirgan kamida 2605 rossiyalik Rossiya Federatsiyasida jinoiy ayblovlar ostida sudlanuvchiga aylandi. Bu haqda 11 aprel, payshanba kuni chop etilgan «Novaya gazeta. Yevropa» nashri materialida aytiladi.
Jurnalistlarning ma’lum qilishicha, 1130 kishi «fuqarolik» jinoyatlarida - yo‘l harakati qoidalarini buzishdan tortib qotillikkacha, qolganlari - harbiy xizmatga qarshi jinoyatlar, jumladan, bo‘linmani ruxsatsiz tark etishda ayblangan. Ishlarning yarmidan ko‘pi - 57 foizida - sudlar urushda ishtirok etishni yengillashtiruvchi holat deb tan oldi, «fuqarolik» ishlarida bu nisbat yuqoriroq bo‘ldi, deyiladi materialda.
«Novaya gazeta» misol tariqasida «Vagner» XHK sobiq yollanma askarining sobiq xotinini kaltaklaganini keltirgan, ayol ikki hafta kasalxonada yotib, maydalangan yuz suyaklarini titan plastinka bilan almashtirish uchun operatsiya o‘tkazishga majbur bo‘lgan. Jabrlanuvchi jinoiy ish qo‘zg‘atishga muvaffaq bo‘lganiga qaramay, sud uning sobiq eri «Baxmutni egallagani uchun» va «Baxmut go‘sht maydalagichi» medallarini sud majlisiga olib kelganidan so‘ng, unga atigi 5000 rubl miqdorida jarima soldi.
Deyarli barcha turdagi jinoyatlar uchun jazo muddati yengillashtirildi
Urush qatnashchilari tomonidan sodir etilgan eng keng tarqalgan jinoyatlardan ba’zilari - mast holda avtomobil boshqarish va giyohvand moddalar savdosi, deya qayd etadi «Novaya». Shu bilan birga, harbiylarning 80 foizi mast holda mashina haydagani uchun jarimaga tortildi, qolganlar esa bunday hollarda axloq tuzatish ishlariga hukm qilindi. Harbiy xizmatchilar, shuningdek, oddiy fuqarolarga qaraganda ikki baravar ko‘p giyohvand moddalar savdosi uchun jarimaga tortilgan, deb yozadi gazeta. «Ushbu yozilmagan qoida deyarli barcha harbiy jinoyatlarga taalluqlidir - mayda poraxo‘rlikdan tortib o‘q-dori savdosigacha», deya qo‘shimcha qiladi jurnalistlar.
«Novaya» ma’lumotlariga ko‘ra, 2023 yilda urush qatnashchilariga nisbatan hukmlar soni yetti barobar, hayot va sog‘likka qarshi zo‘ravonlik jinoyatlari soni esa 13 baravarga oshgan. Urushning kamida 192 ishtirokchisi zo‘ravonlik jinoyatlarida ayblangan, deyiladi materialda.
Nashr ta’kidlaganidek, harbiy xizmatchilar tinch aholiga qaraganda ko‘proq real jazoga hukm qilinadigan yagona jinoyat bu - portlovchi moddalar savdosi hisoblanadi. Ushbu jinoyat uchun urush qatnashchilari boshqa rossiyaliklarga qaraganda to‘rt baravar ko‘p haqiqiy jazo oladi.
