Namangan viloyati Kosonsoy tumanida tol daraxtini shikastlagan fuqaro 8,5 mln to‘laydigan bo‘ldi. Bu haqda viloyat Ekologiya boshqarmasi xabar berdi.
Kosonsoy tuman Ekologiya atrof-muhitni muhofaza qilish va iqlim o‘zgarishi bo‘limi xodimlari tomonidan hududlarda belgilanmagan joyga chiqindi tashlash, noqonuniy daraxt kesish va shikast yetkazishning oldini olish maqsadida reyd tadbiri tashkil etildi.
Tadbir davomida tumanning Ozod mahallasida yashovchi fuqaro U.M. ariq bo‘yida o‘sib turgan tol daraxtini tegishli ruxsatnomalarsiz o‘sishdan to‘xtash darajasida shikastlantirgani aniqlandi.
Holat yuzasidan fuqaro U.M.ga nisbatan Ma’muriy javobgarlik to‘g‘risidagi kodeksning 79-moddasi 1-qismida nazarda tutilgan huquqbuzarlikni sodir etgani sababli ma’muriy bayonnoma rasmiylashtirilib, 8 500 000 so‘m jarima tayinlandi.
