Agentlik bevosita Vazirlar Mahkamasiga bo‘ysunadi va faoliyati yuzasidan hisobot beradi.
Foto: Kun.uz
Vazirlar Mahkamasi qarori bilan O‘zbekiston Energetika bozorini rivojlantirish va tartibga solish agentligi to‘g‘risidagi nizom tasdiqlandi.
Nizomda quyidagilar nazarda tutilgan:
- agentlikning maqomi, asosiy vazifalari va funksiyalari;
- agentlikning huquqlari va javobgarligi;
- agentlik rahbarlarining asosiy funksional vazifalari va javobgarligi;
- agentlik faoliyatini tashkil etish tartibi;
- agentlik faoliyati samaradorligi va natijadorligini baholash mezonlari va ish indikatorlari;
- agentlikni moliyalashtirish va moddiy-texnik ta’minlash, uning xodimlari mehnatiga haq to‘lash va moddiy rag‘batlantirish.
Agentlik energetika bozorini rivojlantirish va tartibga solish sohasida davlat siyosatini amalga oshiruvchi mustaqil respublika ijro etuvchi hokimiyat organi hisoblanadi. U bevosita Vazirlar Mahkamasiga bo‘ysunadi va faoliyati yuzasidan hisobot beradi.
Quyidagilar agentlikning asosiy vazifalari hisoblanadi:
- elektr energiyasining raqobatga asoslangan ulgurji va chakana bozorlarini bosqichma-bosqich tashkil qilishni ta’minlash;
- bozorda raqobatni qo‘llab-quvvatlash, bozorning jozibadorligini hamda talab va taklifning mutanosibligini ta’minlash;
- bozorning barcha ishtirokchilari uchun teng huquq va shaffoflikni ta’minlovchi qonun-qoidalarga rioya etilishi ustidan davlat nazoratini o‘rnatish;
- bozor ishtirokchilari faoliyatini litsenziyalash, ularning litsenziya shartlariga amal qilishini nazorat etish;
- 2026 yildan boshlab elektr energiyasini uzatish va taqsimlash uchun hamda zarur bo‘lgan boshqa xollarda tegishli tariflar va to‘lovlar miqdorlarini tasdiqlash;
- magistral va taqsimlash elektr tarmoqlarda yuzaga keladigan texnologik yo‘qotishlarning ruxsat etilgan me’yorlarini tasdiqlash va boshqalar.
