Zelenskiy: Kursk oblastidagi KXDR askarlari yo‘qotishlarga duchor bo‘lmoqda

Rossiya Federatsiyasining Kursk oblastida joylashgan shimoliy koreyalik askarlarning bir qismi allaqachon Ukraina qurolli kuchlariga qarshi janglarda qatnashmoqda va bu jarayonda ilk yo‘qotishlarga duchor bo‘ldi. Bu haqda 7 noyabr, payshanba kuni Ukraina prezidenti Volodimir Zelenskiy Yevropa siyosiy hamjamiyatining sammitidagi ishtiroki yakunlari bo‘yicha o‘tkazilgan matbuot anjumanida ma’lum qildi.

Agar dunyoning ayrim davlatlari KXDRning Rossiyaning Ukrainaga qarshi urushida ishtirok etishiga «baland ovoz bilan» munosabat bildirgan bo‘lsa, boshqalari umuman munosabat bildirmadi, ba’zilari esa buni «jimgina» qildi va hozirda Kiyev ushbu uchinchi guruh bilan ishlamoqda, dedi Zelenskiy. «Hozir biz ogohlantiramiz va ishonamizki, agar Rossiya Federatsiyasiga nisbatan siyosiy bosim va tegishli qurol ishlatmasak, unda keyingi qadam Shimoliy Koreya kontingentidan ancha kengroq foydalanish bo‘lishi mumkin, chunki Putin doimo dunyoning reaksiyasiga qaraydi. Menimcha, bugungi kunda u yetarli emas», — deya ta’kidladi Ukraina prezidenti.

Kiyev jahon hamjamiyatidan keskin munosabat kutmoqda

Volodimir Zelenskiy 4 noyabr kuni Kursk oblastida allaqachon 11 ming Shimoliy Koreya askari borligini aytdi. Janubiy Koreya rahbariyati ham xuddi shunday ma’lumotlarni e’lon qildi. «Shimoliy koreyaliklar soni ortib borayotganini ko‘ryapmiz, ammo sheriklarimizning munosabati kuchayganini ko‘rmayapmiz», deb shikoyat qildi Zelenskiy. Bir kun o‘tgach, u dunyo hamjamiyatidan vaziyatga «qat’iy javob» berishni talab qildi.

4 noyabr kuni BMT bosh kotibi Antoniu Guterrish Rossiya Federatsiyasi va KXDR o‘rtasidagi harbiy hamkorlikni «xavfli keskinlashuv» yo‘li deb atadi. U Shimoliy Koreya qo‘shinlarining Ukrainaga qarshi urushda qatnashish uchun Rossiyaga jo‘natilgani haqidagi xabarlardan xavotir bildirdi va «bu mojaroning xalqaro miqyosda bo‘lishiga yo‘l qo‘ymaslik uchun hamma narsani qilishga» chaqirdi.

5 noyabr kuni Ukraina tashqi ishlar vaziri Andrey Sibiga Kiyevga tashrif buyurgan nemis hamkasbi Annalena Berbok bilan Shimoliy Koreyaning urushga aralashganiga javoban «qat’iy choralar ko‘rish zarurligini» muhokama qilganini aytdi. «Biz Yevropani Shimoliy Koreya qo‘shinlari endi Yevropada suveren Yevropa davlatiga qarshi tajovuzkor urush olib borayotganini anglab yetishga chaqiramiz», dedi Sibiga.

Umerov: RF shimoliy koreyaliklarni buryatlar qiyofasida yashiryapti

Ukraina mudofaa vaziri Rustem Umerov 6 noyabr kuni e’lon qilingan Janubiy Koreyaning KBS telekanaliga bergan intervyusida shimoliy koreyaliklar bilan ilk janglar haqida ma’lum qildi. Shu bilan birga, u rossiyaliklar shimoliy koreyaliklarni buryatlar qiyofasida yashirayotgani va shuning uchun KXDR harbiy xizmatchilarining shaxsini aniqlash qiyinligini ta’kidladi.