NATO RF gibrid hujumlariga qarshi choralarni kuchaytirmoqda

NATO Rossiya gibrid hujumlariga qarshi kurash choralarini kuchaytirmoqda. 4 dekabr, chorshanba kuni Bryusselda NATO bosh kotibi Mark Ryutte ma’lum qilishicha, Shimoliy Atlantika alyansi mamlakatlari tashqi ishlar vazirlari Rossiya Federatsiyasining dushmanona harakatlariga qarshi qaratilgan chora-tadbirlar paketini kelishib oldi. Bu chora-tadbirlar razvedka ma’lumotlarini almashishni kuchaytirish, ko‘proq mashqlar, muhim infratuzilmani yaxshiroq himoya qilish, kibermudofaani yaxshilash va Rossiyaning soyadagi flotiga qarshi qattiqroq choralarni o‘z ichiga oladi, dedi Ryutte.

Uning so‘zlariga ko‘ra, Rossiyaning yashirin urushi diversiyalardan tashqari, hakerlik hujumlari hamda neft va tabiiy gaz ta’minoti bilan bog‘liq shantajlarni ham o‘z ichiga oladi, bir qator ittifoqchi davlatlar hali ham unga bog‘liq. NATO 2025 yil iyun oyida Haagadagi sammitda gibrid hujumlarga qarshi kurashning yangi strategiyasini tasdiqlashni rejalashtirmoqda.

YeP Ukrainaga yordamni va RFga qarshi sanksiyalarni kuchaytirishga chaqirdi

Yevroparlament 28 noyabr kuni Ukraina bo‘yicha keng ko‘lamli rezolyutsiyani qabul qildi, unda u «Ukraina g‘alabasigacha» Kiyevga siyosiy, harbiy, gumanitar, iqtisodiy va moliyaviy yordam ko‘rsatishni kuchaytirish va tezlashtirishga chaqiradi. Hujjatni 390 kishi yoqlab chiqdi, 135 nafari qarshi bo‘ldi va 52 nafari betaraf ekanini bildirdi.

Yevroparlament o‘z rezolyutsiyasida, xususan, Yevropa Ittifoqi va uning davlatlaridan Ukrainani samolyotlar, uzoq masofali raketalar, shu jumladan TAURUS, zamonaviy havo mudofaa tizimlari bilan ta’minlashni, shuningdek, talablarni qondirish uchun va’da qilingan texnika yetkazib berishni tezlashtirishni so‘ragan.

Yevroparlament deputatlari barcha Yevropa Ittifoqi davlatlari va NATO ittifoqchilari birgalikda va yakka tartibda Ukrainani harbiy jihatdan qo‘llab-quvvatlash majburiyatini olishlari, har yili yalpi ichki mahsulotining kamida 0,25 foizini shu maqsadda sarflashlari kerakligini ta’kidladilar.

Yevroparlament Yevropa komissiyasidan Ukraina iqtisodiyotini qo‘shimcha moliyaviy yordam ko‘rsatish va sarmoyaviy imkoniyatlarni rag‘batlantirish orqali qo‘llab-quvvatlash bo‘yicha keyingi chora-tadbirlarni ishlab chiqishni so‘raydi. Yevroparlament deputatlari, shuningdek, Rossiyaning fuqarolik infratuzilmasiga, xususan, energetikaga muntazam hujumlari natijasida millionlab ukrainaliklar asosiy xizmatlarsiz qolishiga javoban YeIning gumanitar yordamini sezilarli darajada oshirish zarur, deb hisoblaydi.